Qazaqstan men Reseıdiń elektr energııasy salasyndaǵy baılanysy jańa deńgeıge kóterilip otyr - «KEGOK» AQ prezıdenti
nbsp;Mamyrdyń 4-i. QazAqparat /Qanat Mámetqazyuly/ ‑ Qazaqstan men Reseı arasyndaǵy elektr energııasy salasy boıynsha dástúrli qarym- qatynasy jańa sapaly deńgeıge kóterilip otyr.
Búgin Qazaqstan men Reseı energııa júıeleriniń parallel jumysyn qamtamasyz etý sharttarynyń tolyq toptamasyna qol qoıý barysynda «KEGOK» AQ prezıdenti Almasadam Sátqalıev osylaı málim etti, dep habarlaıdy QazAqparat.
«Eki memlekettiń elektr energetıkasy salasyndaǵy dástúrli seriktestik qarym-qatynasy sapalyq jaǵynan jańa deńgeıge kóterilip otyr. Qazaqstan men Reseı basshylarynyń Birtutas kedendik keńistikti qurý baǵytyndaǵy saıasaty sheńberinde búgingi jasalǵan kelisimder osy energııa júıeleriniń parallel jumysynyń ekonomıkalyq jáne tehnologııalyq artyqshylyqtaryn eki memleket tutynýshylarynyń ıgiligi úshin barynsha tıimdi paıdalanýǵa múmkindik beredi», dedi «KEGOK» AQ prezıdenti Almasadam Sátqalıev.
Onyń aıtýynsha, eki memleket birtutas elektr júıeleriniń kórsetetin ózara qyzmetteri kommertsııalyq negizge kóshedi. Reseı jaǵy elektr energııasyn qazaqstandyq jeliler arqyly jetkizý/tasymaldaýdy aqyly negizde júzege asyratyn bolady. «KEGOK» AQ óz kezeginde Qazaqstan birtutas elektr júıeleriniń júıelik operatory retinde normatıvtik jıilikti qadaǵalaý qyzmetine aqy tóleı bastaıdy.
Esterińizge sala keteıik, eki el arasynda osy ýaqytqa deıin qýatty (jıilikti) retteý elektr energııasynyń tranzıtine qaıtarym retinde júzege asyrylyp kelgen bolatyn. Al mundaı sharttyq mindettemelerdiń bolýy dıspetcherlik qyzmet jaýapkershiligin arttyrýǵa jáne eki memleket shekarasy arqyly ótetin elektr energııasy aǵynynyń saldosyn qadaǵalaýǵa yqpal etetin bolady.
