Qazaqstan men Reseıdiń Adam quqyqtary jónindegi ýákilderi onlaında kezdesti
Kezdesý barysynda adam quqyqtaryn ilgeriletý jáne qorǵaý salasyndaǵy odan ári yntymaqtastyq máseleleri talqylandy.
Reseılik ombýdsmen Tatıana Moskalkova Qazaqstannyń qoǵamdyq baqylaý boıynsha oń tájirıbesin eskere otyryp, qazaqstandyq ombýdsmen Elvıra Ázimovany RF-daǵy Adam quqyqtary jónindegi ýákildiń jáne RF-daǵy saılaý barysynda azamattardyń saılaý quqyqtaryn qorǵaý jónindegi óńirlik ombýdsmenderdiń jumysymen tanysýǵa shaqyrdy.
Kezdesý barysynda E.Ázimova Adam quqyqtaryn qorǵaý jáne kemsitpeý maqsatynda ultaralyq jáne konfessııaaralyq kelisim salasyndaǵy ózara is-qımyldy kúsheıtýdi usyndy. Eki el arasyndaǵy turaqty dostyq qarym-qatynastardy saqtaýdyń mańyzdylyǵyn atap ótti. E.Ázimova Qazaqstan men Reseı Adam quqyqtarynyń jalpyǵa birdeı deklaratsııasynyń, Azamattyq jáne saıası quqyqtar týraly halyqaralyq paktiniń, tildik belgisi boıynsha qýdalaýǵa jol bermeıtin Násildik kemsitýshiliktiń barlyq nysandaryn joıý týraly halyqaralyq konventsııanyń qatysýshylary bolyp tabylatynyn eske saldy.
Qazaqstan Respýblıkasy Konstıtýtsııasynyń 14-babynda: «tegine, áleýmettik, laýazymdyq jáne múliktik jaǵdaıyna, jynysyna, násiline, ultyna, tiline baılanysty eshkimdi kemsitýge bolmaıdy...». Uqsas norma Reseı Federatsııasynyń Konstıtýtsııasynda qarastyrylǵan.
Osyǵan baılanysty Qazaqstandaǵy Adam quqyqtary jónindegi ýákil QR jáne RF quqyq qorǵaý organdaryna mundaı faktilerdi muqııat tekserý jáne jolyn kesý, jeke ózi jasaıtyn nemese kótermeleıtin, onyń ishinde Internet jelilerdi paıdalana otyryp, osyndaı kemsitýshilikti jasaıtyn quqyq buzýshylardy jaýapkershilikke tartý týraly júginýdi usyndy.
E.Ázimova halyqaralyq qoǵamdastyqtyń mundaı faktileri adam quqyqtarynyń óreskel buzylýy dep tanylyp, ultaralyq alaýyzdyqtyń órshýine yqpal etetinin, nátıjesinde qoǵamdaǵy turaqsyzdyq pen qaqtyǵystarǵa, qaıǵyly oqıǵaǵa ákep soqtyratyn agressııany jáne óshpendilikti týdyratynyn atap ótti.
«Memlekettik jáne basqa da tilderdi qurmetteý saıasatyn ilgeriletý adamdy jáne onyń quqyqtaryn qurmetteý qaǵıdattarynda tek qana beıbit jáne zańdy tásildermen júzege asyrylýǵa tıis. Bul qarapaıym azamattarǵa ǵana emes, azamattyq jáne saıası qaıratkerlerge de qatysty. Biz basqa azamattarǵa, onyń ishinde tildik belgileri boıynsha agressııany, óshpendilikti jáne tózbeýshilikti týdyratyn jarııa málimdemelerdi kótermelemeýimiz kerek», - dep atap ótti Ázimova kezdesý barysynda.
