Qazaqstan men Reseı júkterdi aýystyryp tıeýdiń kólemi týraly kelisýde
ASTANA. QazAqparat - Qazaqstan men Reseı júkterdi aýystyryp tıeýdiń kepildendirilgen kólemi týraly kelisimge qol qoıý baǵytynda jumys isteýde, dep habarlaıdy QazAqparat.
QR Taý-ken óndirýshi jáne taý-ken metallýrgııa kásiporyndarynyń respýblıkalyq qaýymdastyǵy baspasóz qyzmetiniń atap ótýinshe, EAEO aıasyndaǵy ýaǵdalastyqqa qol jetkizýdiń kelesi qadamy - Qazaqstan men Reseı arasynda júkterdi aýystyryp tıeýdiń kepildendirilgen kólemin qarastyratyn úkimetaralyq kelisim jasasý bolyp otyr.
«Kelisim naqty pishinge beıimdelip kele jatqanyn kórip otyrmyz. Búginde qujattyń jobasy ázirlenip, reseılik taraptyń qaraýyna jiberildi. Atalǵan qujatty jasaýmen ókiletti organ retinde QR Investıtsııalar jáne damý mınıstrligi, sonymen qatar «Atameken» Qazaqstannyń ulttyq kásipkerler palatasy aınalysty. Úkimetaralyq kelisimge osy jyldyń sońyna deıin qol qoıylyp, 2018 jyldyń qańtarynda kúshine enýi múmkin», - dedi QR Taý-ken óndirýshi jáne taý-ken metallýrgııa kásiporyndarynyń respýblıkalyq qaýymdastyǵynyń basshysy Nıkolaı Radostovets.
Onyń atap ótýinshe, Qazaqstan men Reseı arasyndaǵy bul úkimetaralyq kelisim odaqtas basqa memleketter úshin ilki joba bolmaq.
