Qazaqstan men Reseı ıadrolyq medıtsına jáne reaktorlyq tehnologııalar boıynsha birlesken jobalardy damytady
ASTANA. KAZINFORM — Peterbýrg halyqaralyq ekonomıkalyq forýmy aıasynda Qazaqstan Respýblıkasynyń Atom energııasy jónindegi agenttigi men Kýrchatov ınstıtýty arasynda ózara túsinistik týraly memorandýmǵa qol qoıyldy.
Qujat ǵylymı zertteýler, kadr daıarlaý, tájirıbe almasý jáne atom energııasyn beıbit maqsatta paıdalaný salasyndaǵy birlesken jobalardy damytýǵa baǵyttalǵan.
Qol qoıý rásiminde Qazaqstannyń Atom energııasy jónindegi agenttiginiń tóraǵasy Almasadam Sátqalıev Qazaqstan men Reseı arasyndaǵy ǵylymı-tehnologııalyq áriptestikti nyǵaıtýdyń mańyzyn atap ótti.
— Qazaqstan atom salasyn keshendi damytýdykózdeıdi. Bul baǵytqa atom elektr stantsııasynyń qurylysy, zertteý ınfraqurylymyn damytý, ınjenerlik kadrlar daıarlaý jáne halyqaralyq yntymaqtastyqty keńeıtý kiredi. «Kýrchatov ınstıtýty» ulttyq zertteý ortalyǵy osy jumystaǵy negizgi seriktesterdiń biri sanalady. Qol qoıylǵan memorandým yntymaqtastyǵymyzǵa jańa serpin berip, naqty birlesken jobalardy iske asyrýǵa negiz bolady dep senemiz, — dedi Almasadam Sátqalıev.
Taraptar yntymaqtastyqtyń basym baǵyttary retinde termoıadrolyq zertteýlerdi, reaktorlyq tehnologııalardy, ıadrolyq medıtsınany jáne ǵylymı ınfraqurylymdy tsıfrlandyrýdy aıqyndady.
Sondaı-aq birlesken ǵylymı-zertteý jobalaryn júzege asyrý kózdelgen.
Qazaqstan men Reseıdiń zertteý uıymdarynyń áleýetin paıdalaný arqyly kadr daıarlaý jáne ǵylymı tájirıbe almasý baǵytyndaǵy áriptestik te keńeıtiledi.
Memorandýmdy iske asyrý ǵylymı-tehnologııalyq baılanysty nyǵaıtyp, zertteý bazasyn damytýǵa jáne atom salasy úshin joǵary bilikti mamandar daıarlaýǵa yqpal etedi dep kútilip otyr.
Sankt-Peterbýrgke jumys sapary barysynda Almasadam Sátqalıev Kýrchatov ınstıtýtynyń qyzmetimen de tanysty.
Oǵan ǵylymı zertteýlerdiń negizgi baǵyttary, biregeı zertteý ınfraqurylymy jáne ıadrolyq ári termoıadrolyq tehnologııalar salasyndaǵy perspektıvaly ázirlemeler tanystyryldy.
Eske salaıyq, buǵan deıin Qazaqstan men Reseı elimizdegi alǵashqy atom elektr stantsııasynyń qurylysyn qarjylandyrý týraly kelisimge qol qoıǵan bolatyn.
