Qazaqstan men Reseı ıadrolyq qaýipsizdik boıynsha jańa jospar qabyldady
ASTANA. KAZINFORM — Qazaqstan men Reseı ıadrolyq jáne radıatsııalyq qaýipsizdik salasyndaǵy yntymaqtastyqty keńeıtedi, dep habarlaıdy Atom energııasy jónindegi agenttiktiń baspasóz qyzmeti.
Reseı Federatsııasy Prezıdentiniń Qazaqstan Respýblıkasyna memlekettik sapary aıasynda 2026 jylǵy 28 mamyrda Qazaqstan Respýblıkasynyń Atom energııasy jónindegi agenttigi men Ekologııalyq, tehnologııalyq jáne atomdyq qadaǵalaý jónindegi federaldyq qyzmeti (Reseı Federatsııasy) arasyndaǵy atom energııasyn beıbit maqsatta paıdalaný kezinde ıadrolyq jáne radıatsııalyq qaýipsizdikti retteý salasyndaǵy yntymaqtastyq jónindegi ózara túsinistik týraly Memorandýmdy iske asyrý maqsatynda 2026–2030 jyldarǵa arnalǵan ıadrolyq jáne radıatsııalyq qaýipsizdikti retteý salasyndaǵy vedomstvoaralyq yntymaqtastyq jónindegi is-sharalar josparyna qol qoıyldy.
Qujat qol jetkizilgen ýaǵdalastyqtardy is júzinde júzege asyrýǵa jáne eki eldiń beıindi vedomstvolary arasyndaǵy ózara is-qımyldy damytýǵa baǵyttalǵan.
Jospar lıtsenzııalaý, baqylaý-qadaǵalaý qyzmeti, saraptamalyq konsýltatsııalar, semınarlar, taǵylymdamalar jáne ıadrolyq jáne radıatsııalyq qaýipsizdikti retteý máseleleri boıynsha kásibı ózara is-qımyldyń ózge de nysandary salalarynda tájirıbe almasýdy qosa alǵanda, birlesken is-sharalar ótkizýdi kózdeıdi.
Normatıvtik-quqyqtyq bazany jetildirýge, kadrlyq áleýetti damytýǵa, sondaı-aq atom elektr stantsııasyn salý jobasyn iske asyrý úshin qajetti Qazaqstan Respýblıkasynyń zańnamasyn beıimdeý jáne úılestirý máselelerine erekshe nazar aýdarylatyn bolady.
— Jospardy iske asyrý ekijaqty yntymaqtastyqty odan ári nyǵaıtýǵa, ıadrolyq jáne radıatsııalyq qaýipsizdikti retteýdiń ulttyq júıesin damytýǵa, halyqaralyq tájirıbe men úzdik praktıkalardy engizýge, sondaı-aq beıbit maqsatta atom energııasyn qaýipsiz paıdalanýdy qamtamasyz etý úshin tıimdi retteýshilik ınfraqurylymdy qalyptastyrýǵa yqpal etedi, — delingen agenttik habarlamasynda.
Budan buryn Qasym-Jomart Toqaev Reseı prezıdentine Balqashta AES salýda batyl qoldaý kórsetkeni úshin alǵys aıtty.
