Qazaqstan men Reseı úsh JEO salý jónindegi kelisimge qol qoıdy
«Samuryq-Qazyna» qorynyń basshysy reseılik áriptestermen energetıka máseleleri boıynsha kelissóz júrgizdi, dep habarlaıdy Kazinform qorǵa silteme jasap.
Memleket basshysynyń Sankt-Peterbýrg qalasyna jumys sapary aıasynda «Samuryq-Qazyna» AQ basqarma tóraǵasy Nurlan Jaqypov «Fırma ORGRES» kompanııasynyń dırektorlar keńesiniń tóraǵasy Sultan ıAhıaevpen jáne «Inter RAO — Eksport» bas dırektory Maksım Sergeevpen kezdesti.
Kezdesý qorytyndysy boıynsha «Samuryq-Qazyna» AQ men «Inter RAO — Eksport» kompanııasy arasynda Kókshetaý, Semeı jáne Óskemen qalalarynda úsh JEO salý jobalary, sondaı-aq «Samuryq-Energo» AQ men «Fırma ORGRES» kompanııasy arasynda Ekibastuz GRES-2-de reseılik jabdyqty paıdalana otyryp, № 3 jáne № 4 energoblok salý jóninde yntymaqtastyq týraly kelisimge qol qoıyldy.
Qos tarap energetıka salasynda áriptestik pen ınfraqurylymdy damytý jóninde tájirıbe almasýǵa nıetti ekenin jetkizdi.
