Qazaqstan men Reseı ýnıversıtetteri 1453 jobaǵa qol qoıǵan
MÁSKEÝ. KAZINFORM — Oralda ótip jatqan XXI Qazaqstan — Reseı óńiraralyq forýmynyń plenarlyq sessııasyna beınebaılanys arqyly qatysyp jatqan Memleket basshysy Reseıdiń joǵary oqý oryndary Qazaqstandaǵy JOO-lardyń kópshiligimen seriktestik ornatqanyn aıtty, dep habarlaıdy Aqordanyń baspasóz qyzmeti.
Memleket basshysy Uly Abaıdyń sózin keltirdi: «Orystyń ǵylymy, óneri — dúnıeniń kilti, ony bilgenge dúnıe arzanyraq túsedi». Prezıdenttiń sózinshe, bul sóz áli de ózekti. Reseıdiń joǵary oqý oryndary, Reseıdiń ǵylymy álemdik ǵylym-bilim progresinde kóptegen kórsetkish boıynsha kósh bastap keledi.
— Eki eldiń joǵary oqý oryndary arasynda qos dıplomdy baǵdarlamany jáne birlesken ǵylymı-bilim berý jobalaryn júzege asyrýdy qarastyratyn 1453 kelisimshart jasalǵan. Qazaqstanda Reseı ýnıversıtetteriniń toǵyz fılıaly tabysty qyzmet istep jatyr. Onda tórt myńǵa jýyq stýdent bilim alady. Ásirese, qurmetti Vladımır Vladımırovıch, sonaý 2001 jyly Sizdiń tikeleı aralasýyńyzben ashylǵan Lomonosov atyndaǵy Máskeý memlekettik ýnıversıtetiniń fılıalyn aıryqsha atap ótýge bolady. Sonymen qatar Astanada Máskeý memlekettik halyqaralyq qatynastar ınstıtýtynyń bólimshesi jumysyn bastady. Reseıde Qazaqstan ýnıversıtetiniń alǵashqy ókildiginiń ashylýy biz úshin eleýli ýaqıǵa boldy. Dostoevskıı atyndaǵy Omby memlekettik ýnıversıtetiniń bazasynda ál-Farabı atyndaǵy Qazaq ulttyq ýnıversıtetiniń fılıaly jemisti jumys isteı bastady, — dedi Toqaev.
Sonymen qosa Qasym-Jomart Toqaev jańa turpatty maman daıarlaý maqsatynda tehnıkalyq jáne kásiptik bilim berýde aýqymdy transformatsııa júrgizilip jatqanyn aıtty.
— Kolledjder teorııany praktıkamen, al bilim berý úderisin óndirispen ushtastyratyn kásibı mamandar ustahanasyna aınalýy qajet. Sondyqtan dýaldy oqytý úlgisin belsendi damytýdy qolǵa aldyq. Qazirgi tańda 100 myńnan astam stýdent 18 myń kásiporynnyń bazasynda óndiristik tájirıbeden ótip jatyr. Tórt myńnan asa kompanııa 600 kolledjge qamqorlyq kórsetedi. Olar stýdentterdiń óndiristik tájirıbeden ótip, shyńdalýyna, oqý ornyndaǵy qural-jabdyqtardy jańǵyrtýǵa atsalysady. Tehnıkalyq jáne kásiptik bilimdi aqysyz negizde berý jobasy iske asyrylýda. Jumysqa ornalasýǵa kepildik bere otyryp, maman daıarlaý mehanızmi engizildi. Sonymen qatar kásibı baǵdarlaý jumystary júrgizilýde. Jastar kolledjde oqýdy shyn máninde suranysqa ıe mamandyqty meńgerý jolyndaǵy alǵashqy sanaly qadam retinde qabyldaýǵa tıis. Pedagogterdiń qoǵamdaǵy mártebesi men biliktiligin arttyrýǵa aıryqsha kóńil bólinedi. Tehnıkalyq jáne kásiptik bilim berýdi ınternatsıonaldandyrý aıasynda halyqaralyq standarttar engizilip, sheteldik menedjerdi tartý jáne akademııalyq utqyrlyqty damytý qolǵa alyndy. Qazaqstandaǵy 60-tan astam kolledj 30 eldegi seriktesterimen yntymaqtastyq ornatty. Al toǵyz kolledjimiz Reseı kolledjderimen jáne kásiporyndarymen tabysty jumys istep jatyr, — dedi Memleket basshysy.
Osydan buryn Qasym-Jomart Toqaev pen Vladımır Pýtın eki el delegatsııalarynyń qatysýymen keńeıtilgen quramda kelissóz júrgizgeni habarlandy.