Qazaqstan men Reseı transshekaralyq ózenderdi birlesip paıdalaný máselesin talqylap jatyr
Qazaqstan men Reseıdi álemdegi eń uzyn shekaralardyń biri ǵana emes, Jaıyq, Ertis, Esil, Tobyl, Elek, Qıǵash, Qaraózen jáne Saryózen sııaqty transshekaralyq ózender de biriktirip jatyr.
Eki el arasyndaǵy sý qatynasy 2010 jylǵy 7 qyrkúıektegi «Transshekaralyq sý obektilerin birlesip paıdalaný jáne qorǵaý týraly» kelisimmen retteledi. Birlesken komıssııa jáne atalǵan ózender boıynsha jumys toptary osy kelisim aıasynda jumys isteıdi.
Birlesken komıssııaǵa qos tarap teń tóraǵalyq etedi. Qazaqstannan ókil – QR Ekologııa, geologııa jáne tabıǵı resýrstar vıtse-mınıstri S.M. Muqataev, Reseıden – RF Sý resýrstary federaldy agenttigi tóraǵasynyń orynbasary V.A. Nıkanorov.
«Otyrys barysynda barlyq transshekaralyq ózender basseınderi boıynsha jumys toptary basshylarynyń esebi tyńdalady. Taraptar aǵymdaǵy jyldaǵy kóktemgi sý tasqyny, sý qoımalardy toltyrý jáne turǵyndar men ekonomıka salalaryn sýmen qamtamasyz etý sharttary, gıdrotehnıka qurylystaryn keshendi paıdalaný jáne eksplýatatsııalaý, transshekaralyq sý obektileriniń sý resýrstarynyń lastanýy men sarqylýynyń aldyn alý týraly aqparattarmen almasatyn bolady.
Onymen bir mezgilde, Jaıyq ózeni basseıniniń problemalaryn sheshýge, iri transshekaralyq ózender basseınderinde zertteý júrgizý boıynsha Yntymaqtastyqty belsendirýdiń biryńǵaı jol kartasyn iske asyrýǵa nazar aýdarylmaq.
Іs-sharaǵa eki eldiń mınıstrlikteriniń, sý sharýashylyǵy uıymdarynyń, gıdrometeorologııa qyzmetteriniń, jergilikti atqarýshy organdardyń jáne basqa da mekemelerdiń ókilderi qatysyp jatyr», - delingen habarlamada.
Eske salsaq, komıssııa men jumys toptarynyń otyrystary jylyna bir ret ár memleket aýmaǵynda kezektesip ótkiziledi.
Foto: gov.kz
