Qazaqstan men Reseı traktorlar men KamAZ bólshekterin birlesip óndirmek
NUR-SULTAN. QazAqparat - Qazaqstan men Reseı Kırovets markaly traktorlardyń, arnaıy tehnıkalardyń jáne KamAZ avtokomponentterin birlesip óndirýge kelisti, dep habarlaıdy QazAqparat.
«QR Premer-Mınıstri Asqar Mamınniń Reseı Federatsııasyna sapary aıasynda ónerkásip salasyna qatysty eki qujatqa qol qoıyldy. Osy oraıda «Agromashholdıng KZ» AQ-da Kırovets markaly traktorlar men olardyń quramdas bólshekteri óndirisin uıymdastyrý» jobasyn iske asyrý boıynsha jol kartasy jáne arnaıy tehnıka men KAMAZ avtokomponentterin óndirý boıynsha birlesken jobalardy iske asyrý yntymaqtastyǵy týraly kelisim qamtyldy», - dep atap ótilgen QR IIDM baspasóz qyzmetiniń málimetinde.
Qazaqstandyq taraptan arnaıy tehnıka men KAMAZ avtokomponentterin óndirý boıynsha birlesken jobalardy júzege asyrý jónindegi yntymaqtastyq týraly kelisimge QR Indýstrııa jáne ınfraqurylymdyq damý vıtse-mınıstri Amanııaz Erjanov, Qazaqstan avto bıznesi qaýymdastyǵynyń prezıdenti Andreı Lavrentev, «QDB-Lızıng» AQ Basqarma tóraǵasy Nurlan Baıbazarov, al Reseı tarapynan Reseı Federatsııasynyń ónerkásip jáne saýda vıtse-mınıstri Aleksandr Morozov pen «KamAZ» JAQ bas dırektory Sergeı Kogogın qol qoıdy.
Amanııaz Erjanov atap ótkendeı, kelisim aıasynda QR IIDM eldiń qoldanystaǵy zańnamasyna sáıkes, Qazaqstan aýmaǵynda óndiristi ınvestıtsııalaý úshin qolaıly jaǵdaılar jasaýǵa jáne óndiriske qoldaý kórsetýge nıetti.
Budan bólek, «Agromashholdıng KZ» AQ-da Kırovets markaly traktorlar men olardyń quramdas bólshekteri óndirisin uıymdastyrý» jobasyn iske asyrý boıynsha jol kartasyna Qazaqstan avto bıznesi qaýymdastyǵynyń prezıdenti Andreı Lavrentev jáne Reseı tarapynan «Peterbýrgskıı traktornyı zavod» AQ dırektory Sergeı Serebrıakov qol qoıdy.
Qujat salyq preferentsııalaryn, KamAZ óndirisiniń avtomobılderin jáne olardyń quramdas bólshekterin jasaýǵa baǵyttalǵan jeńildikpen qarjylandyrýdy (onyń ishinde lızıngtik qarjylandyrýdy), sondaı-aq qurylǵan óndiristerdiń daıyn ónimderin jeńildikpen lızıngtik qarjylandyrýdy qarastyrady.
