Qazaqstan men Reseı tatý kórshilik pen odaqtastyq rýhyna negizdelgen rııasyz dostyqty nyǵaıtty — Toqaev
ASTANA. KAZINFORM — Qazaqstan men Reseı tatý kórshilik pen odaqtastyq rýhyna negizdelgen rııasyz dostyqty nyǵaıtty. Bul týraly Qazaqstan Prezıdenti Qasym-Jomart Toqaev «Izvestııa» gazetine jarııalanǵan maqalasynda jazdy.
«Bıyl Qazaqstan Ujymdyq qaýipsizdik týraly shart uıymyna tóraǵalyq etip otyr. Astanada ótetin aldaǵy sammıt aımaqtaǵy qaýipsizdik pen turaqtylyqty nyǵaıta túsetin basty oqıǵa bolmaq. Elimiz ujymdyq qaýipsizdikti beıbit jolmen qamtamasyz etý jáne uıymǵa múshe memleketter arasyndaǵy dostyq qarym-qatynasty saqtaý jolynda kúsh biriktirýdi barynsha qoldap otyr», — dedi Prezıdent.
Sondaı-aq, Memleket basshysy BRIKS uıymynyń Qazan qalasyndaǵy tarıhı sammıti óte nátıjeli bolǵanyn atap ótedi.
«Bul forým Vladımır Vladımırovıch Pýtınniń erik-jigeri men abyroı bedeliniń jáne álem jurtynyń 45 paıyzynyń múddesin qorǵaıtyn birlestikke Reseıdiń tıimdi tóraǵalyq etýiniń arqasynda ótti», — dedi Qasym-Jomart Toqaev.
Prezıdent bıyl eki jaqty qarym-qatynas úshin jemisti jyl boldy dep senimmen aıtýǵa bolatyndyǵyn basa aıtady.
«Sonymen birge, 2025 jyly kóptegen birlesken bastamalar men ortaq jobalardy júzege asyrýǵa mol múmkindik bar. Sonyń bári eki el azamattarynyń ıgiligine aınalady dep senemin. Qazaqstan men Reseı tatý kórshilik pen odaqtastyq rýhyna negizdelgen rııasyz dostyqty nyǵaıtty jáne eń bastysy, ózara senimdi qarym-qatynas ornatty. Biz elderimizdiń basty múddesine saı keletin eń batyl ıdeıalardy birge júzege asyra alamyz dep oılaımyn. Al, Qazaqstanǵa keler bolsaq, biz tarıhtyń qaqtyǵysqa jáne apatqa toly kúrdeli kezeńinde Reseıdiń senimdi strategııalyq seriktesi ári odaqtasy bolyp qala beremiz», — dedi Memleket basshysy.
Eske sala keteıik, buǵan deıin Prezıdenttiń shaqyrýymen Vladımır Pýtın Qazaqstanǵa memlekettik saparmen keletinin jazǵan bolatynbyz.
