Qazaqstan men Reseı sport salasyndaǵy yntymaqtastyq máselelerin talqylady
ASTANA. KAZINFORM – Týrızm jáne sport mınıstri Erbol Myrzabosynov 5-shi Dúnıejúzilik kóshpendiler oıyndary aıasynda Reseı Federatsııasynyń sport mınıstri Mıhaıl Degtıarevpen kezdesti. QR Týrızm jəne sport mınıstrliginiń baspasóz qyzmeti málimdedi.
Kezdesý barysynda mınıstr eki eldiń yntymaqtastyǵynyń joǵary deńgeıde ekenin aıtyp, BRIKS elderiniń sporttyq oıyndary jáne «Azııa balalary» halyqaralyq sport oıyndary sııaqty negizgi halyqaralyq sporttyq is-sharalardy ótkizýdegi jetistikterin atap ótti. Qazaqstan ulttyq quramasynan bıylǵy BRIKS elderi oıyndaryna – 108, «Azııa balalary» oıyndaryna 200 sportshy qatysty.
«Keıingi eki jylda qazaqstandyq sportshylar Reseı aýmaǵynda 40-tan astam oqý-jattyǵý jıynyn ótkizdi. Bul eki el arasyndaǵy sporttyq baılanysty nyǵaıtatyny sózsiz. Qazaqstan olımpıadalyq daıarlyq ortalyǵy bazalaryn paıdalaný arqyly osy tájirıbeni jalǵastyrýdy usynady», - dedi mınıstr.
Sonymen qatar ulttyq sport túrlerin damytý máselelerine de erekshe nazar aýdarylǵanyn aıta ketken jón. Máselen, 5-shi Dúnıejúzilik kóshpendiler oıyndarynyń baǵdarlamasyna Saha Respýblıkasynyń (ıAkýtııa) ulttyq sporty – mas-restlıng pen tatar halqynyń ulttyq kúresi – koresh engizildi. Oıyndarǵa Reseı Federatsııasynyń 197 ókili qatysýda.
Mıhaıl Degtıarev Týrızm jáne sport mınıstrine qonaqjaılyq tanytqany úshin alǵys bildirdi. Sondaı-aq BRIKS elderi jáne «Azııa balalary» oıyndarynda qazaqstandyq sportshylardyń tabysty óner kórsetkenin aıtty. Sonymen qatar Dúnıejúzilik kóshpendiler oıyndary joǵary deńgeıde uıymdastyrylǵanyn jáne aýqymdy ekenin atap ótti.
