Qazaqstan men Reseı «Soıýz-5» jáne «Báıterek» ushý synaqtary boıynsha komıssııa qurmaq

ASTANA. KAZINFORM — Qazaqstan men Reseı «Soıýz-5» jáne «Báıterek» zymyran keshenderiniń ushý synaqtaryn ótkizý jónindegi komıssııa qurýǵa ýaǵdalasty. Bul týraly QR Jasandy ıntellekt jáne tsıfrlyq damý mınıstrligi habarlady.

Qazaqstan Respýblıkasynyń Prezıdenti Qasym-Jomart Toqaev pen Reseı Federatsııasynyń Prezıdenti Vladımır Pýtınniń kezdesýi barysynda úkimetaralyq jáne vedomstvoaralyq qujattarmen almasý rásimi ótti.

Solardyń qatarynda — «Soıýz-5» jáne «Báıterek» zymyran keshenderiniń ushý synaqtaryn ótkizý jónindegi Qazaqstan-Reseı memleketaralyq komıssııasyn qurý týraly kelisim de bar.

Búgin Máskeýde Qazaqstan Respýblıkasy Úkimetiniń atynan Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev atalǵan kelisimge qol qoıdy.

— Komıssııany qurý ushý synaqtaryna daıyndyq pen olardy ótkizý boıynsha jumystardy úılestirýge, sondaı-aq ǵarysh salasyndaǵy Qazaqstan men Reseı yntymaqtastyǵynyń negizgi baǵyttarynyń biri bolyp sanalatyn «Báıterek» jobasyn odan ári iske asyrýǵa múmkindik beredi, — delingen habarlamada.

Mınıstrliktiń málimetine sáıkes «Báıterek» jobasy 2004 jyly qol qoıylǵan úkimetaralyq kelisimge sáıkes «Baıqońyr» ǵarysh aılaǵynda júzege asyrylýda jáne ol Qazaqstannyń zymyran-ǵarysh salasyn damytýdyń jańa kezeńin qamtamasyz etip, eldiń tehnologııalyq jáne ónerkásiptik áleýetin nyǵaıtýǵa baǵyttalǵan.

Budan buryn Qasym-Jomart Toqaev pen Vladımır Pýtın kelissózder qorytyndysy boıynsha Qazaqstan Respýblıkasy men Reseı Federatsııasynyń memleketaralyq qarym-qatynasyn jan-jaqty strategııalyq seriktestik jáne odaqtastyq deńgeıine deıin jetkizý jónindegi deklaratsııaǵa qol qoıǵanyn jazǵan edik.