Qazaqstan men Reseı Soltústik — Ońtústik kólik dáliziniń múmkindikterin birlesip keńeıtedi — Prezıdent maqalasy
ASTANA. KAZINFORM — Prezıdent Qasym-Jomart Toqaev Reseıdiń «Rossııskaıa gazeta» basylymyna shyqqan «Máńgilik dostyq — halyqtarymyzǵa jol silter temirqazyq» atty avtorlyq maqalasynda eki aradaǵy kólik-logıstıkalyq baılanystyń mańyzyna toqtalǵan.
— Men kólik-logıstıka salasyndaǵy ózara is-qımyldy tereńdetýdi asa mańyzdy strategııalyq is dep sanaımyn. Qazaqstan aýmaǵy boıynsha 13 halyqaralyq kólik dálizi ótedi. Bul — Azııa men Eýropa arasyn jalǵaıtyn, qurlyqtaǵy ózara júk tasymalynyń shamamen 85%-yn qamtamasyz etetin bes temirjol, segiz avtomobıl dálizi.
Qazaqstan men Reseı aýmaǵyn, geografııalyq ornyn eskersek, tranzıttik marshrýttar men tıisti ınfraqurylymdy odan ári damytý búkil Eýrazııanyń turaqty kólik baılanysyn qamtamasyz etetindeı mańyzǵa ıe. Osy maqsatqa jetý úshin elderimiz «Batys Eýropa — Batys Qytaı» avtomobıl dáliziniń ótkizý qabiletin arttyrýǵa kúsh salyp jatyr. Qazaqstan-Reseı shekarasyndaǵy 30 avtomobıl ótkizý pýnkti jańǵyrtylyp jatyr, — dedi Memleket basshysy.
Sondaı-aq, maqalada eki el «Soltústik — Ońtústik» kólik dáliziniń shyǵys tarmaǵynyń múmkindikterin birlesip keńeıtýge kúsh salatyny sóz bolǵan.
— Qazirdiń ózinde bul baǵyttaǵy júk tasymalynyń kólemi aıtarlyqtaı óskeni baıqalady. Bul úderiste Reseı — Qazaqstan — Túrkimenstan — Iran temirjoly erekshe ról atqarady. Jol kartasyna qol qoıyldy. Ol iske assa aldaǵy bes jylda atalǵan strategııalyq «arterııanyń» ótkizý qabileti jylyna 20 mln tonnaǵa deıin jetedi.
Atalǵan baǵyttar ekijaqty yntymaqtastyqta mańyzdy oryn alady. Biraq barlyq áleýetti salany eskersek, ózara is-qımyldyń aýqymy áldeqaıda keń. Eki eldiń úkimetterine bolashaq ekonomıkanyń kelbetin aıqyndaıtyn jańa salalardy, birinshi kezekte, joǵary tehnologııalardy ózara áriptestiktiń alǵy shebine shyǵarý tapsyryldy, — dep jazady Memleket basshysy.
Aıta ketelik Prezıdenttiń Máskeý saparynda jańa deklaratsııaǵa qol qoıylady.