Qazaqstan men Reseı Syrtqy ister mınıstrlikteri yntymaqtastyq boıynsha is-sharalar josparyn bekitti
ASTANA. KAZINFORM — Qazaqstan men Reseı Syrtqy ister mınıstrlikteri 2027-2028 jyldarǵa arnalǵan yntymaqtastyq boıynsha is-sharalar josparyn bekitti. Bul týraly Syrtqy ister mınıstri Ermek Kósherbaev reseılik áriptesi Sergeı Lavrovpen kezdesýden keıingi brıfıngte aıtty.
— Elderdi dostyq, tatý kórshilik berik dástúri, tyǵyz saýda-ekonomıkalyq jáne mádenı-gýmanıtarlyq baılanystar biriktiredi. Qazaqstan-Reseı ózara qarym-qatynasynyń turaqty damýy úshin memleketterimizdiń basshylary arasyndaǵy senimdi dıalogtyń mańyzy zor. Osy turǵyda aldaǵy birlesken jumystyń baǵyt-baǵdaryn aıqyndaǵan ótken jyldyń qarashasyndaǵy Qazaqstan Prezıdenti Qasym-Jomart Toqaevtyń Reseıge memlekettik sapary erekshe atap ótildi. Reseı Federatsııasynyń Prezıdenti Vladımır Pýtınniń Qazaqstanǵa aldaǵy memlekettik saparyn bıylǵy ekijaqty ózara is-qımyldyń asa mańyzdy kezeńi retinde qarastyramyz. Bul sapar saıası dıalogty nyǵaıtyp, praktıkalyq yntymaqtastyqty jańa deńgeıge kóteredi dep esepteımiz. Reseı árdaıym bizdiń jetekshi saýda seriktesterimizdiń biri bolyp keledi. Buǵan deıin atap ótkenimdeı, ótken jyldyń qorytyndysynda ózara saýda kólemi 27 mlrd dollardan asty, — dedi Ermek Kósherbaev.
Onyń málimetinshe, eki el arasynda ekonomıkalyq ózara baılanystyń joǵary deńgeıin rastaıtyn birqatar iri birlesken joba júzege asyrylyp jatyr. Búgingi kelissózder barysynda taraptar energetıka, kólik, logıstıka, ónerkásip, tsıfrlandyrý, sondaı-aq mádenı-gýmanıtarlyq saladaǵy ózara is-qımyl sııaqty basym baǵyttar boıynsha yntymaqtastyq keleshegin jan-jaqty qarastyrdy. Sonymen qatar óńirlik jáne halyqaralyq kún tártibindegi ózekti máseleler boıynsha mazmundy pikir almasý boldy.
— Basty halyqaralyq jáne óńirlik uıymdar aıasynda is-qımyldy odan ári tyǵyz úılestirýge daıyn ekenimiz rastaldy. Kezdesý qorytyndysynda Sergeı Lavrovpen Qazaqstan Syrtqy ister mınıstrligi men Reseı Syrtqy ister mınıstrligi arasyndaǵy 2027-2028 jyldarǵa arnalǵan yntymaqtastyq boıynsha is-sharalar josparyna qol qoıdyq. Búgingi kelissózderdiń nátıjesi Qazaqstan men Reseı arasyndaǵy strategııalyq áriptestik pen odaqtastyqty odan ári nyǵaıtýǵa yqpal etedi dep senemin, — dedi mınıstr.
Buǵan deıin Ermek Kósherbaev pen Sergeı Lavrov kelissóz ótkizgenin habarlaǵan edik.
