Qazaqstan men Reseı shyǵys pen batysty baılanystyrady - sarapshy
ASTANA. KAZINFORM — Qazaqstan Prezıdenti Qasym-Jomart Toqaevtyń Máskeýge memlekettik sapary jaı ǵana dıplomatııalyq oqıǵa emes. Bul turǵyda ekonomıka men tranzıtten bastap, gýmanıtarlyq seriktestik pen óńirlik turaqtylyqqa deıingi Qazaqstan men Reseıdiń ózara is-qımylynyń jańa modelin qurýǵa jasalǵan qadam bolmaq.
Bul týraly Kazinform agenttiginiń menshikti tilshisine bergen suhbatynda Óńirlik máseleler ınstıtýtynyń jetekshisi Dmıtrıı Jýravlev málim etti.
D. Jýravlev Qazaqstan Prezıdentiniń Máskeýge memlekettik sapary barysynda qol qoıylýy múmkin kelisimderge toqtala kele, negizgi qujattar ekonomıkalyq salaǵa – saýda men tranzıtke qatysty bolatynyn atap ótti.
- Saýda – Astana men Máskeý úshin mańyzdy ekijaqty formattaǵy negizgi sala. Al tranzıttiń jahandyq mańyzy bar. Qazaqstan men Reseı - Shyǵys pen Batysty baılanystyratyn eki el. Meniń oıymsha, aldaǵy joǵary deńgeıdegi kezdesýde bul máseleler basty nazarda bolady, - dedi sarapshy.
Onyń paıymynsha, ekijaqty kún tártibindegi negizgi taqyryptarǵa kólik, ónerkásip jáne tsıfrlandyrý kiredi. Bul baǵyttardy tabysty júzege asyrý úshin áleýet pen resýrstardyń kooperatsııasy qajet.
– Mindetter óte aýqymdy – bir eldiń emes, kóp eldiń kúsh-jigeri qajet. Prezıdentterdiń kezdesýinde dál osy másele talqylanady, - dedi ol.
Dmıtrıı Jýravlev óńirde múddeler balansyn saqtaý qajet ekenine nazar aýdaryp, seriktesterdiń barlyǵynyń arasyndaǵy qarym-qatynasty qurýdaǵy dıplomatııanyń rólin atap ótti.
- Áskerı saladaǵy odaqtar bárimen dos bolýǵa kedergi jasamasa, barlyǵymen dostyq qarym-qatynasty ornatýǵa bolady. Eger memleket áskerı bloktyń quramynda bolsa, tıisti kelisim aıasyndaǵy ýaǵdalastyqtarmen shekteledi. Biraq barlyq basqa jaǵdaılarda Reseımen, Qytaımen, Eýropa odaǵymen jáne AQSh-pen aıtarlyqtaı nátıjeli yntymaqtastyqty ornatýdyń múmkindigi mol», - dedi spıker.
Jýravlevtiń aıtýynsha, Qytaı Ortalyq Azııa elderimen yntymaqtastyqty kúsheıtýge erekshe mán berip otyr. Al AQSh osy óńirdegi baılanystardy endi ǵana nyǵaıta bastady. Eýropa odaǵy belsendilik tanytyp jatyr, biraq EO-nyń múmkindikteri shekteýli.
Ekonomıkamen qatar mádenı-gýmanıtarlyq sala da yntymaqtastyqtyń basym baǵyty bolyp qala beredi. Sarapshynyń sózine qaraǵanda, bul sala eki el arasyndaǵy senimdi nyǵaıtyp, jaqyndastyrýǵa septigin tıgizedi.
- Mádenı-gýmanıtarlyq ózara is-qımyl - Qazaqstan-Reseı qarym-qatynasynyń mańyzdy bóligi. Bul rette, eki el mádenıetin Qazaqstanda da, Reseıde de damytýǵa mán berý kerek. Sondyqtan bul taqyryp nazardan tys qalmaıdy, ıaǵnı mádenı-gýmanıtarlyq baılanystar memleketterdiń órkendeýi úshin mańyzdy, - dedi ol.
Sarapshynyń pikirinshe, Ortalyq Azııaǵa qatysty Reseıdiń syrtqy saıasatynyń vektory ózgerissiz qalǵan, degenmen ony júzege asyrý jan-jaqty ólshemdelgen sıpatta órbip keledi. Osy oraıda Máskeý teń quqyly seriktestikke, ekonomıkalyq pragmatızmge jáne dıplomatııalyq balansqa súıenip, dástúrli baılanystardy ózgermeli geosaıası jaǵdaıdaǵy ózara is-qımyldyń jańa formalarymen úılestiredi.
Buǵan deıin Qazaqstan Prezıdenti Qasym-Jomart Toqaev 11-12 qarashada Reseı Federatsııasyna memlekettik saparmen baratynyn jazǵan edik.