Qazaqstan men Reseı shekarasyndaǵy baqylaý jeńildetiledi - Senat komıteti
ASTANA. 18 maýsym. QazAqparat - Búgin Qazaqstan Respýblıkasy Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy bolyp ótti.
Onda «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Qazaqstan-Reseı memlekettik shekarasynda birlesken baqylaýdy júzege asyrý salasyndaǵy yntymaqtastyq týraly kelisimdi ratıfıkatsııalaý týraly» Qazaqstan Respýblıkasynyń Zańynyń jobasy qaraldy.
Eki memleket arasyndaǵy yntymaqtastyq týraly osy kelisimge 2009 jyldyń qyrkúıeginde Orynbor qalasynda qol qoıylǵan. Atalǵan qujatta formaldylyqtar men baqylaý uzaqtyǵyn qysqartý, sondaı-aq onyń tıimdiligin jeke tulǵalar men kólik quraldarynyń Qazaqstan-Reseı shekarasyn kesip ótýi kezinde birlesken baqylaýdy júrgizý jolymen arttyrý kózdeledi. Bul rette eki taraptyń baqylaý organdary zańnamalyq buzýlar nemese buzýǵa árekettenýler faktisin rastaý úshin dáleldemeler jınaýdy qamtamasyz etý maqsatynda bir-birine qajetti kómek kórsetedi.
Kelisimdi ratıfıkatsııalaý shekaradaǵy baqylaýdy jeńildetýge múmkindik beredi. Syrtqy ekonomıkalyq qyzmettiń qatysýshylaryna qolaıly jaǵdaı týǵyzady. Sonymen birge, eki memleket arasyndaǵy taýar aınalymyn arttyrady.
Senat komıtetiniń otyrysy barysynda tujyrymdamalyq turǵyda maquldanǵan zań jobasy Palatanyń qaraýyna jiberildi.
