Qazaqstan men Reseı shekarasynda jańa shekaralyq ótkel ashý josparlanýda
ASTANA. QazAqparat - RF Saratov oblysynyń úkimeti Qazaqstanmen ekonomıkalyq baılanystar men kólik qatynasyn damytý maqsatynda Aleksandrov-Gaı aýdanynan shekaralyq ótkel ashýdy josparlaýda, dep habarlaıdy QazAqparat tilshisi Reseıdegi QR Elshiliginiń baspasóz qyzmetine silteme jasap.
Bul aýmaq arqyly Qazaqstan men Ortalyq Azııaǵa baratyn eń qysqa ári qolaıly tranzıt ótedi. Halyqaralyq baılanys bolmaǵandyqtan, munda shaǵyn bıznes damymaı, kókónis sharýashylyǵy jumysyn toqtatqan, Qazaqstannan jemshóp satyp alatyn mal sharýashylyǵy mekemeleri de shyǵynǵa batqan.
«Memlekettik Dýmadaǵy Saratov depýtattaryna, «Reseı temirjoly» basshylyǵyna júginý jóninde sheshim qabyldandy. Aldaǵy ýaqytta keden qyzmetimen shekaralyq ótkeldi ashý, onyń ishinde Aleksandrov-Gaı - Qaztalov jolyn jóndeý jospary bar, buǵan qarjylyq-ekonomıkalyq negizdeme daıyndalady» - delingen Elshiliktiń habarlamasynda.
Bul shekaralyq ótkeldiń ashylýy bolashaqta Qazaqstanmen shekaradaǵy 220 shaqyrymdyq Ýrbah -Aleksandrov-Gaı avtojolyn federaldy menshikke berý máselesiniń kóterilýine túrtki bolmaq.
Ekijaqty avtomobıldik pýnkt 2010 jylǵa deıin bolǵan. Qazir ol demalys jáne mereke kúnderi ǵana jumys isteıtin arnaıy shekaralyq ótkelge aınaldy. Ótkizý áleýeti aıyna 150 avtokólikten aspaıdy, al taýar men júk ótkizýge tyıym salynǵan. Eń jaqyn jabdyqtalǵan pýnkt 500 shaqyrym qashyqtyqtaǵy Ozın aýdanynda ornalasqan.
