Qazaqstan men Reseı shekarasynda 36 mln teńgeniń zańsyz dári-dármegi tárkilendi

AQTÓBE. QazAqparat – Qazaqstan shekarashylary Aqtóbe oblysyndaǵy «Jaısań» avtokólik ótkizý pýnktinde iri kólemdegi zańsyz dári-dármekti alyp ótýdiń jolyn kesti, dep habarlaıdy QazAqparat QR UQK baspasóz qyzmetine silteme jasap.

«Máskeýden (RF) Bishkekke (Qyrǵyzstan) baǵyt alǵan «DAF» markili avtokólikti ınspektsııalyq-tekseris qurylǵysy men talshyqty-optıkalyq endoskopty qoldana otyryp tekserý barysynda «úı jıhazdary» negizgi júginiń astyna jasyrylǵan 19 200 dana (80 qorapta 240 orama) «Zınnat» (ishke qabyldaý úshin sýspenzııa daıyndaýǵa arnalǵan túıirshikter) dárisi anyqtaldy. Ótkizilmek bolǵan júktiń ruqsat qujaty bolmaı shyqty. Dári-dármektiń quny 36 384 000 teńge», delingen habarlamada.

Shekarashylardyń aıtýynsha, Qazaqstan aýmaǵy arqyly dárini zańsyz alyp ótýge qatysty derek buǵan deıin de tirkelgen.

Ustalǵan júk Aqtóbe oblysynyń Ekonomıkalyq tergeý departamentine berildi.