Qazaqstan men Reseı shekarasyndaǵy júk kólikteriniń keptelisi: QazAvtoJol túsinikteme berdi
ASTANA. KAZINFORM – «Aqtóbe – Mártók – RF shekarasy (Orynborǵa)» baǵytyndaǵy avtojoldyń jóndelip jatqan ýchaskesinde aýyr júk kólikteriniń keptelisi tirkelmegen. Bul týraly QazAvtoJol resmı aqparat taratty.
Atap aıtqanda, uzyndyǵy 92 shaqyrym bolatyn atalǵan avtojoldyń 54-84 jáne 95-99 shaqyrym aralyǵyndaǵy bólikterinde 2025 jylǵy 22 mamyrdan bastap ortasha jóndeý jumystary júrgizilip jatyr. Jalpy jóndeletin bólik – 34 shaqyrym.
2025 jylǵy 3 maýsymdaǵy jaǵdaı boıynsha 3,5 shaqyrymda tómengi qabat asfaltbeton jabyny tóselgen. Jol boıyndaǵy qozǵalys pen aınalma joldarda (96-98 km) kólik qozǵalysy shtattyq rejımde júzege asyrylyp jatyr.
Jóndeý jumystary bastalǵaly beri (13 kún ishinde) ýchaskede kólik keptelisi tirkelmegeni atap ótilgen resmı aqparatta.
Sonymen qatar «Jaısan» ótkizý pýnkti aldynda uzyndyǵy 1 shaqyrym bolatyn eki qabatty jol tóseý jumystary jalǵasyp jatyr. Bul jumystar kólik qozǵalysyna kedergi keltirmeıtindeı uıymdastyrylǵan.
Osylaısha qazirgi ýaqytta shekara mańyndaǵy jol jóndeý jumystary kólik keptelisine sebep bolmaı otyrǵany resmı túrde rastaldy.
Aıta keteıik, buǵan deıin 2025 jyly elimizde joldardy jóndeýge 781 mıllıard teńge qarastyrylǵany jaıly jazǵanbyz.