Qazaqstan men Reseı shekarasynda keptelis bolýy múmkin – Komıtet túsinikteme berdi
ASTANA. KAZINFORM – Memlekettik kirister komıteti syrtqy ekonomıkalyq qyzmetke qatysýshylar men tasymaldaýshylardy irgeles memlekettiń aýmaǵynda aldaǵy jóndeý jumystary týraly habardar etti.
Orynbor oblysy boıynsha Reseı Federatsııasynyń FQQ Shekara basqarmasynyń resmı aqparatyna sáıkes:
1. 2025 jylǵy 19-29 mamyr aralyǵynda «Mashtakovo» avtokólik ótkizý pýnktinde (Reseı Federatsııasynan Qazaqstan Respýblıkasyna shyǵý baǵyty) ınspektsııalyq-tekserý kesheniniń negizin qalpyna keltirý boıynsha jóndeý jumystary júrgiziledi.
2. Sondaı-aq 2025 jylǵy 19 mamyr men 30 qarasha aralyǵynda Reseı Federatsııasynyń ýákiletti organdary «Teploe» ekijaqty avtokólik ótkizý pýnktiniń aýmaǵynda jol tósemin jóndeý jumystaryn josparlap otyr.
– Jóndeý is-sharalaryn júrgizý kezeńinde ótkizý pýnktteriniń jumysy shtattyq rejımde júzege asyrylady. Olardyń jumys isteý tártibine ózgerister engizý kózdelmegen. Sonymen qatar «Syrym» jáne «Tasqala» qazaqstandyq ótkizý pýnktteriniń mańynda kólik quraldarynyń qozǵalysyna ýaqytsha qıyndyqtar týyndaýy jáne keptelister bolýy múmkin, - delingen habarlamada.
Osyǵan baılanysty Memlekettik kirister komıeti tasymaldaýshylarǵa marshrýttardy aldyn ala josparlaýdy jáne múmkindiginshe memlekettik shekaradan ótý kezinde balama baǵyttardy paıdalanýdy qaperge saldy.
Eske sala keteıik, buǵan deıin ózbek tarapy Qazaqstan, Reseı jáne Ázerbaıjan azamattaryn shekaradan jeke kýálikpen ótkizý tártibin engizý múmkindigin qarastyryp jatqanyn jazǵan edik.