Qazaqstan men Reseı shekaradaǵy ózenderde sý tasqynyna daıyndalyp jatyr
ASTANA. KAZINFORM – Sý tasqynyn boljaý jáne aldyn alý úshin elimizdiń Tótenshe jaǵdaılar mınıstrligi janyndaǵy respýblıkalyq daǵdarys ortalyǵy Reseıdiń Tótenshe jaǵdaılar mınıstrliginiń daǵdarys jaǵdaıdaǵy ulttyq basqarý ortalyǵymen transshekaralyq ózenderdegi sý deńgeıiniń jaı-kúıi týraly turaqty aqparat almasýda.
Qazir tasqynǵa qarsy ınfraqurylymdy nyǵaıtý jáne táýekeldi azaıtýǵa baǵyttalǵan jumystar istelip jatyr. Negizgi is-sharalardyń qatarynda bógetter salý jáne nyǵaıtý, sýdy burý arnalary men aryqtar qazý, sondaı-aq sýdy ótkizý qurylystary men káriz júıesin jóndeý jumystary bar. Alaıda, sarapshylardyń pikirinshe, Reseı federatsııasymen shekarany kesip ótetin ózenderde bógetter buzylǵan nemese sý deńgeıi kúrt kóterilgen jaǵdaıda, atqarylǵan jumystar jetkiliksiz bolýy múmkin.
Osy oraıda elimizdiń Tótenshe jaǵdaılar mınıstrligi sý tasqynynyń aldyn alýda ýákiletti organdar men uıymdardy tıimdi basqarý jáne ózara is-qımyl jasaý úshin jahandyq jáne óńirlik aýqymdaǵy tótenshe jaǵdaılardy joıý jónindegi is-qımyl jospary ázirlenip, bekitilgenin habarlap otyr.
— Elimizdiń Tótenshe jaǵdaılar mınıstrligi, óńirlik tótenshe jaǵdaılar departamentterimen birlesip Reseıdiń Tótenshe jaǵdaılar mınıstrliginiń daǵdarys jaǵdaıynda basqarý ortalyqtarymen turaqty negizde aqparattyq ózara is-qımyldy júzege asyrady. Onyń ishinde transshekaralyq ózenderdegi sý deńgeıi men gıdrotehnıkalyq qurylystardyń jaı-kúıi jáne aýa raıynyń ózgerýi týraly aqparat almasady, - delingen agenttik joldaǵan saýal jaýabynda.
Osylaısha, elimizdiń Tótenshe jaǵdaılar mınıstrligi tasqyn boljamyna qatysty derekterdi taldaı otyryp, aldyn alý, jedel den qoıý sharalaryn qarastyryp jatyr.
Aıta ketsek, búginde elimizdiń barlyq sý qoımalary sý tasqyny kezeńine daıyndalýda.
Sonymen qatar óńirlerde sý tasqynynyń aldyn alýǵa qatysty qandaı jumys atqarylyp jatqanyn habarlaǵan edik.