Qazaqstan men Reseı shegirtkege qarsy birlesken jospar ázirlemek
ASTANA. KAZINFORM — Qazaqstan Respýblıkasy men Reseı Federatsııasy arasyndaǵy ekijaqty is-qımyl aıasynda shekaralas aýmaqtarda shegirtke zııankesteriniń taralýyn boldyrmaý maqsatynda 2026 jylǵa arnalǵan birlesken is-sharalar josparyn ázirleý jáne oǵan qol qoıý týraly ýaǵdalastyqqa qol jetkizildi.
Mundaı sheshim AShM AÓK memlekettik ınspektsııa komıteti men RF AShM ókilderiniń qatysýymen ótken keńes qorytyndysy boıynsha qabyldandy.
Jıyn barysynda aǵymdaǵy fıtosanıtarııalyq jaǵdaı máseleleri, sondaı-aq monıtorıng júrgizý, úıirli shegirtkeleriniń oshaqtaryn der kezinde anyqtaý jáne qorǵaý sharalaryn júzege asyrý baǵytyndaǵy ózara is-qımyldy kúsheıtý tetikteri qaraldy.
Eki eldiń beıindi qyzmetteriniń jumysyn úılestirýge jáne vegetatsııalyq kezeńde jedel aqparat almasýdy uıymdastyrý máselelerine erekshe nazar aýdaryldy.
Jospardy iske asyrý taraptar is-qımyldarynyń úılesimdiligin qamtamasyz etýge, júrgiziletin qorǵaý sharalarynyń tıimdiligin arttyrýǵa, shegirtke zııankesteriniń taralý qaýpin barynsha azaıtýǵa múmkindik beredi, sondaı-aq fıtosanıtarııalyq qaýipsizdikti nyǵaıtý men aýyl sharýashylyǵy daqyldarynyń ónimdiligin saqtaýǵa septigin tıgizedi.
Aıta ketelik BQO-da shegirtkege qarsy 455 myń gektar jer hımııalyq óńdeýden ótkizilmek.
