Qazaqstan men Reseı senatorlary kezdesti
NUR-SULTAN. QazAqparat - Almatyda QR Parlamenti Senaty men RF Federaldy jınalysy Federaldy keńesi arasyndaǵy yntymaqtastyq jónindegi komıssııanyń 14-otyrysy ótti, dep habarlaıdy QazAqparat tilshisi Senattyń baspasóz qyzmetine silteme jasap.
Otyrysty ashqan Senat tóraǵasynyń orynbasary Sergeı Gromov buǵan deıin ótken komıssııanyń 13-otyrysy óziniń tıimdiligin kórsetkendigin atap ótti. Parlamenttik ózara is-qımyldyń jańa deńgeıine qol jetkizilip, eki memlekettiń zańnamasyn úılestirý salasynda úlken jumys atqarylǵanyn aıtty.
Sonymen qatar ol Senat pen Federaldy keńes arasyndaǵy yntymaqtastyq týraly kelisimge sáıkes otyrys jumysyna eki beıindi komıtet qosylǵanyn eske saldy.
Óz kezeginde reseılik taraptan komıssııanyń teń tóraǵasy RF Federatsııa keńesi tóraǵasynyń orynbasary I.Ýmahanov ótkizilip otyrǵan otyrystyń mańyzdylyǵyn atap ótti. Sonymen qatar tsıfrlyq ekonomıkany damytý, jastarǵa qoldaý kórsetý jáne bul saladaǵy yntymaqtastyq máselelerine nazar aýdartty.
«Bul otyrystyń jemisti bolaryna jáne bizdiń zań shyǵarýshy organdarymyzdyń ózara tıimdi yntymaqtastyǵyna oń yqpalyn tıgizetindigine senimdimiz», - dedi S.Gromov.
Otyrys barysynda Qazaqstan men Reseı senatorlary quqyq qorǵaý organdary men sottardy qosa alǵandy tsıfrlandyrýdy zańnamalyq qamtamasyz etý, jastarǵa qoldaý kórsetý, sonymen qatar eki eldiń jastar uıymdary yntymaqtastyǵynyń keleshegi máselelerin talqylady.
Otyrysqa senatorlar Georgıı Kım, Jeńis Nurǵalıev, Tóleýbek Muqashev, Nurlan Beknazarov, Vladımır Volkov, Ǵumar Dúsembaev, Sergeı Plotnıkov, Aqparat jáne qoǵamdyq damý vıtse-mınıstri Juldyz Omarbekova, Tsıfrlyq damý, qorǵanys jáne aeroǵarysh ónerkásibi vıtse-mınıstri Abylaıhan Ospanov, QR Joǵarǵy soty qylmystyq ister jónindegi sot alqasynyń sýdıasy Erden Áripov, Bas prokýrordyń orynbasary Marat Ahmetjanov qatysty.
Sonymen qatar delegatsııalar Yqylas atyndaǵy halyq mýzyka aspaptary mýzeıinde bolyp, Máńgilik alýǵa gúl shoqtaryn qoıdy.
Komıssııanyń kezekti 15-otyrysy Reseıde ótedi. Naqty datasy men ótetin orny komıssııa hatshylyǵy arqyly kelisiletin bolady.
