Qazaqstan men Reseı saýda jáne ınvestıtsııa kólemin ulǵaıta berýge tıis – Prezıdent

MÁSKEÝ. KAZINFORM – Memleketter basshylary Oral qalasynda ótip jatqan XXI Qazaqstan – Reseı óńiraralyq forýmynyń plenarlyq sessııasyna beınebaılanys arqyly qatysyp jatyr, dep habarlaıdy Aqordanyń baspasóz qyzmeti.

Bıylǵy forýmnyń taqyryby – «Jumysshy mamandyqtary – ekonomıkalyq ósimniń qozǵaýshy kúshi»

Qasym-Jomart Toqaev Forýmǵa eki eldiń nátıjeli strategııalyq seriktestigin aıshyqtaıtyn aıtýly shara retinde baǵa berdi.

-Osy biregeı alańda ekonomıkalyq, ınfraqurylymdyq jáne gýmanıtarlyq baǵyttaǵy tyń jobalar dúnıege kelip, keıin óńirlik deńgeıde kezeń-kezeńimen júzege asyrylyp jatady. Munyń mańyzy zor. Óıtkeni ekonomıkalyq ósim jáne ónerkásip, ǵylym, bilim, mádenıet salalaryndaǵy yntymaqtastyq eń áýeli óńirlerde qalyptasady, -dedi QR Prezıdenti.

Sondaı-aq Memleket basshysy saýda-ekonomıkalyq, ınvestıtsııalyq yqpaldastyq jyl ótken saıyn turaqty túrde nyǵaıyp kele jatqany týraly aıtty.

-Reseı – Qazaqstannyń eń iri saýda jáne ınvestıtsııalyq seriktesi. Eki el arasyndaǵy taýar aınalymy 28 mıllıard dollardan asty. Ony 30 mıllıard dollarǵa deıin jetkizý úshin júıeli jumys júrgizilip jatyr. 2024 jyly Reseı ınvestıtsııasy rekordtyq deńgeıge jetip, 4 mıllıard dollardy qurady. Al osyǵan deıin Qazaqstanǵa salynǵan reseılik ınvestıtsııanyń jalpy kólemi, bizdiń málimetimiz boıynsha, 27 mıllıard dollardan asty. Óz kezeginde Qazaqstan Reseıge toǵyz mıllıardqa jýyq ınvestıtsııa quıdy. Elimizde Reseı kapıtalynyń úlesi bar 20 myńnan astam kompanııa jumys isteıdi. Olar myńdaǵan jumys ornyn ashyp, ekonomıkamyzdyń qarqyndy ósýine zor úles qosyp keledi. Osy qomaqty kórsetkishterden ózara yntymaqtastyq deńgeıi qanshalyqty joǵary ekenin ańǵarýǵa bolady. Biz munymen toqtamaı, únemi alǵa umtylyp, saýda jáne ınvestıtsııa kólemin ulǵaıta berýge tıispiz dep sanaımyn,-dedi Qasym-Jomart Toqaev.

Osyǵan deıin Toqaev pen Pýtın keńeıtilgen quramda kelissóz júrgizgeni týraly jazdyq.