Qazaqstan men Reseı sarapshylary jahandyq turaqsyzdyq jaǵdaıyndaǵy yntymaqtastyqty talqylady
ALMATY. KAZINFORM – Almatyda Qazaqstan men Reseı sarapshylar keńesiniń úshinshi otyrysy ótip jatyr.
Jıyn «Qazaqstan men Reseı: jahandyq turaqsyzdyq jaǵdaıyndaǵy strategııalyq seriktestik» degen taqyrypta uıymdastyryldy. Oǵan eki eldiń jetekshi taldaý ortalyqtarynyń, ǵylymı-zertteý uıymdary men ýnıversıtetteriniń ókilderi qatysyp jatyr.
Іs-shara ashylýynda Prezıdent janyndaǵy Qazaqstan strategııalyq zertteýler ınstıtýtynyń (QSZI) dırektory Jandos Shaımardanov halyqaralyq ahýaldyń qarqyndy ózgerip jatqanyn, bul memleketter úshin jańa syn-qaterlermen qatar qosymsha múmkindikter beretinin atap ótti.
— Biz álemdik saıasat pen ekonomıkadaǵy tereń ózgeristerdi baıqap otyrmyz. Geosaıası básekelestik kúsheıip, saýda-ekonomıkalyq baılanystar men kólik baǵyttary qaıta qurylyp jatyr, halyqaralyq qaýipsizdik salasyndaǵy táýekelder artyp keledi. Bul úderister is júzinde barlyq memleketterge áser etip, olardy úırenshikti tásilderin qaıta qaraýǵa jáne damýdyń jańa múmkindikterin izdeýge májbúrlep otyr, - dedi ol.
Onyń aıtýynsha, mundaı jaǵdaıda Qazaqstan men Reseı ulttyq múddelerdi eskere otyryp, týyndaıtyn syn-qaterlerge birlesip áreket etýi erekshe mańyzdy. Ol ónerkásiptik kooperatsııa, kólik-logıstıkalyq ınfraqurylymdy damytý, ınvestıtsııalyq ózara is-qımyldy keńeıtý, energetıka, aýyl sharýashylyǵy jáne tsıfrlyq tehnologııalardy qosa alǵanda, yntymaqtastyqtyń birneshe baǵytyn qamtıdy.
Jandos Shaımardanov ótken jyldyń qorytyndysy boıynsha Qazaqstan men Reseıdiń taýar aınalymy shamamen 28 mlrd dollarǵa jetkenin atap ótti. Bul kórsetkishti 30 mlrd dollarǵa deıin ulǵaıtý mindeti qoıylǵan.
— Saýda áleýetin arttyrý úshin bizde qajetti alǵysharttar bar. Elderimizdi eń uzyn qurlyq shekarasy, kóptegen ótkizý pýnktteri jáne tyǵyz ekonomıkalyq ózara is-qımyl baılanystyrady. Negizgi baǵyttardyń birine tsıfrlandyrý aınaldy, onyń aıasynda qazirdiń ózinde birqatar birlesken jobalar júzege asyrylyp jatyr, — dedi QSZI dırektory.
Jandos Shaımardanov birlesken bilim berý jobalaryn damytý eki memlekettiń uzaq merzimdi ózara is-qımylynyń negizin qalyptastyratynyn da atap ótti. Ol Astanada Máskeý memlekettik halyqaralyq qatynastar ınstıtýtynyń fılıaly ashylǵanyn, sondaı-aq Omby qalasynda Ál-Farabı atyndaǵy Qazaq ulttyq ýnıversıteti fılıalynyń ashylǵanyn mysal retinde keltirdi.
Óz kezeginde Reseı ǵylym akademııasynyń Prımakov atyndaǵy Álemdik ekonomıka jáne halyqaralyq qatynastar ınstıtýty (RǴA ÁEHQI) dırektorynyń ǵylymı jumystar jónindegi orynbasary Sergeı Afontsev halyqaralyq saıası jáne ekonomıkalyq ortadaǵy ózgeristerge nazar aýdardy. Onyń sózinshe, geosaıası turaqsyzdyqqa qaramastan, álemde yntymaqtastyqty kúsheıtýdiń múmkindikteri bar.
— Qazir bizdiń basty mindetimiz - eń ózekti máseleler boıynsha pikir almasý bolyp otyr. Yqtımal sheshimder men odan arǵy ózara is-qımyl baǵyttaryn aıqyndaý mańyzdy, — dedi Sergeı Afontsev.
Eske salaıyq, Qazaqstan-Reseı sarapshylar keńesin QSZI men RǴA ÁEHQI 2022 jyldyń qazan aıynda qurǵan bolatyn. Alǵashqy otyrys 2023 jyldyń maýsymynda Máskeýde, ekinshisi — 2024 jyldyń qarashasynda Astanada ótti. Bıylǵy kezdesý úshinshi ret uıymdastyrylyp otyr.
Buǵan deıin Reseıde qansha qazaqstandyq stýdent medıtsına mamandyǵyn oqyp jatqanyn jazǵanbyz.