Qazaqstan men Reseı prokýratýra organdary ardagerleriniń qoǵamdyq birlestikteri yntymaqtastyq týraly kelisimge qol qoıdy

  ASTANA. 10 shilde. QazAqparat - Búgin Bas prokýratýrada Qazaqstan prokýratýra organdary ardagerleriniń Odaǵy men Prokýratýra ardagerleri men zeınetkerleriniń jalpyreseılik uıymy arasyndaǵy Yntymaqtastyq týraly kelisimge resmı túrde qol qoıý rásimi bolyp ótti.

Qujatqa qoǵamdyq birlestik jetekshileri Gúljan Qaraǵusova men Aleksandr Rozanov qol qoıdy.

Kezdesýge qatysýshylar atap ótkendeı, Reseı men Qazaqstan qadaǵalaý organdarynyń ardagerler qoǵamdastyǵynyń kúshin biriktirý eki el prokýrorlarynyń kásibı baılanysynyń keńeıýiniń zańdy jalǵasy bolyp tabylady jáne prokýratýra organdary quqyq qorǵaýshylyq áleýetiniń tıimdiligin odan ári arttyrýdy kózdeıdi.

Kelisimge sáıkes, taraptar prokýrorlyq kadrlar tárbıeleý men urpaqtar sabaqtastyǵyn qamtamasyz etýge jaǵdaı jasaý, prokýrorlyq qadaǵalaýdy jetildirýdiń strategııalyq mindetterin sheshýde ardagerlerdiń tájirıbesin paıdalaný, zańdylyqtyń jáne quqyqtyq tártiptiń buzylýyna qarsy turý tárizdi mańyzdy baǵyttarda yntymaqtasýǵa kelisti.

Sonymen qatar, prokýratýra ardagerleri ardagerlik qozǵalysty damytý máseleleri boıynsha bir-birin aqparattyq-ádistemelik materıaldarmen qamtamasyz etýge, sondaı-aq ózara múddelilik tanytatyn ózge de máseleler boıynsha yqpaldasýǵa nıet bildirip otyr.