Qazaqstan men Reseı prezıdentteri shaǵyn quramda kelissóz júrgizdi
ASTANA. KAZINFORM -Qazaqstan men Reseı prezıdentteri shaǵyn quramda kelissóz júrgizdi, dep habarlaıdy Aqordanyń baspasóz qyzmeti.
Qasym-Jomart Toqaev:
– Qurmetti Vladımır Vladımırovıch, elordaǵa qosh keldińiz! Memlekettik saparmen kelgenińizge qýanyshtymyn. Bul sapardyń elderimiz arasyndaǵy strategııalyq seriktestik pen odaqtastyq qatynastardy damytý turǵysynan máni zor. Sonymen qatar Eýrazııa qurlyǵyndaǵy qaýipsizdik pen turaqtylyqty qamtamasyz etýde de aıryqsha mánge ıe dep oılaımyn. Óıtkeni bizdiń elderimiz alyp Eýrazııa keńistiginiń ózegi sanalady. Osy oraıda eki máseleni erekshe atap ótkim keledi. Birinshisi, elderimiz arasyndaǵy strategııalyq seriktestik pen odaqtastyq qatynastardyń jeti negizi týraly birlesken málimdeme. Jeti – qasıetti san. Qujat óte mazmundy. Bul jóninde baspasóz konferentsııasynda tolyǵyraq aıtamyn. Ony ózim qarap, túzetýler engizdim. Atalǵan málimdeme eki el jylnamasyna mańyzdy oqıǵa retinde enedi dep senemin. Ekinshisi, Qazaqstanda atom elektr stantsııasynyń qurylysyna qatysty kelisimge qol qoıý. Osy jobaǵa qoldaý kórsetkenińiz úshin Sizge rızashylyǵymdy bildiremin. AES qurylysy týraly kelisimniń strategııalyq máni jóninde aıta berý artyq. Bul bárine túsinikti. Biz – dostas, baýyrlas eldermiz. Ortaq baı tarıhymyz bar, mádenı dástúrlerimiz ben halyqtarymyzdyń mentalıteti bir birine uqsas. Keshegi beıresmı kezdesýde ol jóninde egjeı-tegjeıli aıtyp, ótkendi eske aldyq. Reseı úshin de munyń máni erekshe dep oılaımyn. Biz halyqtarymyzdyń túpkilikti múddesine saı jumys isteımiz. Azamattarymyz memleketterimizdiń dostyǵy men yntymaǵy saqtalǵanyn qalaıdy. Odan ári órkendeý úshin barshamyzǵa beıbitshilik qajet.
Vladımır Pýtın:
– Qurmetti Qasym-Jomart Kemeluly! Eń áýeli shaqyrǵanyńyz úshin alǵys aıtamyn. Byltyr bizge memlekettik saparmen kelgenińizge qýandyq. Sol kezde ǵasyrlar boıy, sonyń ishinde bir memleket aıasynda qalyptasqan halyqtarymyz arasyndaǵy berik dostyq pen ózara qurmetke negizdelgen strategııalyq seriktestigimizdi keńeıtý baǵytynda taǵy da alǵa qaraı qadam jasadyq. Búgin de jemisti jumys atqaramyz dep oılaımyn. Beıresmı sıpatta ótken keshegi kezdesý úshin rızashylyǵymdy bildiremin. Ózara yqpaldastyǵymyzdyń kóptegen mańyzdy ári perspektıvti baǵyty boıynsha pikir almastyq. Delegatsııamyz elińizge mereke qarsańynda kelip otyr. Reseı musylmandary Qurban aıt merekesin atap ótedi. Qazaqstanda da bul meıram keńinen toılanatynyn bilemin.
Aıta keteıik, 27-29 mamyr kúnderi Reseı Federatsııasy Prezıdenti Vladımır Pýtınniń Qazaqstanǵa memlekettik sapary ótedi. Memleketter basshylary bul saparda Qazaqstan men Reseı arasyndaǵy jan-jaqty strategııalyq seriktestiktiń jáne odaqtastyq qatynastardyń qazirgi jaı-kúıin, sondaı-aq ony nyǵaıtý perspektıvasyn talqylaıdy.
Budan buryn habarlaǵanymyzdaı, Memleket basshysy Qasym-Jomart Toqaevtyń elimizge memlekettik saparmen kelgen Reseı Prezıdenti Vladımır Pýtındi Táýelsizdik saraıynda resmı qarsy alý rásimi ótti.
