Qazaqstan men Reseı Prezıdentteri eki el halyqtary dostyǵynyń jeti negizi týraly málimdemege qol qoıady
ASTANA. KAZINFORM — Qazaqstan men Reseı Prezıdentteri eki el halyqtary arasyndaǵy dostyq pen tatý kórshiliktiń jeti negizi týraly birlesken málimdemeni bekitedi.
Bul týraly elimizge memlekettik saparmen kelgen Reseı Prezıdenti Vladımır Pýtınmen keńeıtilgen quramdaǵy kelissózder barysynda Memleket basshysy Qasym-Jomart Toqaev aıtty.
Qazaqstan Prezıdenti eki el qarym-qatynasynda oń serpin bar ekenin atap ótti.
— Osy qarqyndy saqtap, jańa jobalar men bastamalar arqyly yntymaqtastyqty damyta beremiz. Bul oraıda búgin qabyldanatyn «Qazaqstan jáne Reseı halyqtary arasyndaǵy dostyq pen tatý kórshiliktiń jeti negizi týraly» birlesken málimdemeniń mańyzyn erekshe atap ótkim keledi. Atalǵan qujat qarym-qatynasymyzdyń sıpatyn tanytady jáne ony uzaqmerzimdi negizde tereńdetýge beıil ekenimizdi kórsetedi, — dedi Qasym-Jomart Toqaev.
Buǵan deıin habarlanǵandaı, Memleket basshysy Qasym-Jomart Toqaevtyń elimizge memlekettik saparmen kelgen Reseı Prezıdenti Vladımır Pýtındi Táýelsizdik saraıynda resmı qarsy alý rásimi ótti.
Sonymen qatar Toqaev Qazaqstan men Reseı yntymaqtastyǵy barlyq salada senimdi túrde damyp kele jatqanyn aıtty.
