Qazaqstan men Reseı prezıdentteri beıresmı kezdesý ótkizdi

MÁSKEÝ. KAZINFORM – Aqorda Qazaqstan men Reseı prezıdentteri beıresmı kezdesý ótkizgenin málimdedi.

Kezdesýde Qasym-Jomart Toqaev eki el arasynda búginde eshqandaı túıtkil joq ekenin alǵa tartty.

– Qurmetti Vladımır Vladımırovıch, eń aldymen, Máskeýge, osynaý qasıetti jerge tabanym tıgen sátten bastap kórsetilgen erekshe syı-qurmet úshin Sizge rızashylyǵymdy bildiremin. Jańa ǵana protokol aspektileri jóninde aıtyldy. Shyn máninde, Reseı astanasyndaǵy ystyq yqylas meni qatty tańǵaldyrdy ári qýantty. Ekijaqty yntymaqtastyq strategııalyq seriktestik, odaqtastyq qatynastar sıpatyna ıe. Barlyq baǵytta birlese jumys atqaryp kelemiz. Memleketterimiz arasynda eshqandaı túıtkil joq. Másele týyndaǵan kúnniń ózinde prezıdentter men úkimetter basshylarynyń kúsh-jigeri arqasynda oń sheshimin tabady. Sizdiń shaqyrýyńyzdy zor yqylaspen qabyl aldym. Rasynda, búgin beıresmı jaǵdaıda pikir almasamyz. Meniń Ózińizben talqylaǵym keletin biraz pikir-paıymym bar, - dedi Qazaqstan Prezıdenti.

Al Reseı basshysy Vladımır Pýtın shekaralas eki eldiń udaıy baılanysta ekenin atap ótti.

– Qurmetti Qasym-Jomart Kemeluly, eń aldymen, Sizge ýaqyt taýyp, keliskenimizdeı, memlekettik saparmen kelgenińiz úshin alǵys aıtamyn. Buǵan shyn júrekten qýanyshtymyn. Árıne, biz udaıy baılanystamyz. Alaıda memleketaralyq qatynastarda mundaı protokoldyq dúnıeler de mańyzdy. Búgin beıresmı jaǵdaıda kezdesip, barlyq ózekti másele boıynsha áńgimelesemiz. Al erteń áriptestermen birge ekijaqty qarym-qatynastyń kún tártibin qarastyramyz jáne perspektıvti baǵyttarǵa nazar aýdaramyz. Jalpy alǵanda, biz osy jyldy óte jaqsy nátıjelermen aıaqtaımyz, sondaı-aq taıaý keleshekke arnalǵan jospardy oryndaımyz dep oılaımyn, - dedi Pýtın.

Aıta keteıik, buǵan deıin Kremlde Qasym-Jomart Toqaev pen Vladımır Pýtınniń beıresmı kezdesýi bastalǵany habarlandy.