Qazaqstan men Reseı poıyzdardaǵy shekara baqylaýyn toqtatty
MÁSKEÝ. QazAqparat - Qazaqstan Respýblıkasynyń Reseı Federatsııasyndaǵy Tótenshe jáne ókiletti elshisi Imanǵalı Tasmaǵambetov pen stats-hatshy - RF syrtqy ister mınıstriniń orynbasary Grıgorıı Karasın Qazaqstan-Reseı shekarasy arqyly jolaýshylar tasymaldaý protsedýrasyn ońtaılandyratyn hattamany rásimdeýge qatysty gramota almasý týraly qujatqa qol qoıdy, dep habarlaıdy Máskeýdegi «QazAqparat» HAA menshikti tilshisi RF-tegi QR Elshiliginiń baspasóz qyzmetine silteme jasap.
Eki eldiń úkimetteri arasyndaǵy temirjol kólikteri uıymdary men mekemeleriniń, kásiporyndarynyń qyzmetin quqyq retteý erekshelikteri jaıly kelisimge ózgerister engizý týraly hattama 2016 jyldyń 4 qazanynda Astanada qol qoıylyp, odan keıin eki eldiń basshylary men parlamentteri ratıfıkatsııalady.
26 qyrkúıekten bastap Astana-Oral jáne Almaty-Oral baǵyttary boıynsha «Tulpar-Talgo» jolaýshylar poıyzy iske qosyldy. Ol Reseıdiń Sol-Iletsk stantsııasy arqyly kún saıyn jolaýshylardy tasymaldaıtyn bolady.
I.Tasmaǵambetov atap ótkendeı, bul - Qazaqstan men Reseıdiń shekaradaǵy oblystarynyń turǵyndary arasyndaǵy baılanysty ońtaılandyryp, týrıstik jáne iskerlik qarym-qatynastyń damýyna múmkindik beredi.
