Qazaqstan men Reseı Petropavlda týrızmdi damytý máselelerin talqylaıdy
ASTANA. QazAqparat - 9 qarasha kúni Petropavl qalasynda «Qazaqstan men Reseıdegi týrızmdi damytýdyń jańa tásilderi men úrdisteri» atty XV aımaqaralyq yntymaqtastyq forýmy ótedi, dep habarlaıdy QazAqparat tilshisi QR Premer-Mınıstriniń baspasóz qyzmetine silteme jasap.
Búgin Astanada ótken Eýrazııalyq ekonomıkalyq komıssııa otyrysynda QR Premer-Mınıstriniń birinshi orynbasary Asqar Mamın Reseı Federatsııasy Premer-Mınıstriniń birinshi orynbasary Anton Sılýanovpen kelissózder júrgizdi.
Baspasóz qyzmetiniń habarlaýynsha, taraptar EAEO aıasynda saýda-ekonomıkalyq saladaǵy yntymaqtastyqty damytýdyń qazirgi jaǵdaıy men keleshegin talqylady. Atap aıtqanda, Reseı men Qazaqstan aýmaqtary arqyly taýarlardyń kedergisiz tranzıtin qamtamasyz etý, eki eldiń aýylsharýashylyq sektoryn damytý úshin qolaıly jaǵdaı jasaý máseleleri qaralǵan.
Asqar Mamın 9 qarashada Petropavl qalasynda «Qazaqstan men Reseıdegi týrızmdi damytýdyń jańa tásilderi men úrdisteri» atty XV aımaqaralyq yntymaqtastyq forýmy ótetinin atap ótti. Onyń aıtýynsha, forým memleketter arasyndaǵy ekijaqty yntymaqtastyqty damytýǵa jańa serpin beredi.
