Qazaqstan men Reseı parlamentaralyq yntymaqtastyq komıssııasynyń otyrysynda shekara mańyndaǵy kóshi-qon úderisteri talqylanady

Bul týraly búgin QR Parlamenti Májilisi men RF Federaldyq Jınalysy Memlekettik dýmasy arasyndaǵy yntymaqtastyq týraly Palataaralyq parlamenttik komıssııanyń segizinshi otyrysynyń kún tártibin talqylaý barysynda málim boldy, dep habarlaıdy QazAqparat.

«Qazaqstan men Reseı Prezıdentteri kóshi-qon úderisteri týraly kelisimge qol qoıǵany belgili. Bul kelisimde Qazaqstan azamattarynyń Reseıde, al Reseı azamattarynyń Qazaqstanda bolýyna qatysty jeńildetilgen tártipterdi engizý sharalary qarastyrylǵan bolatyn. Degenmen, atalǵan kelisimde qamtylǵan sharalar áli de tolyq júzege aspaı otyr. Biz osy máseleni birinshi kezekte qarastyrǵandy jón kóremiz», dedi Palataaralyq parlamenttik yntymaqtastyq komıssııasynyń múshesi Vladımır Nehoroshev.

Reseı tarapy atalǵan másele sheńberinde shekara mańyndaǵy aýmaqtarda azamattardyń ótý tártipterin jeńildetý sharalaryn da talqylaýdy usynýda. «Bul másele shekara mańyndaǵy eldi mekendermen qatar birqatar óńirler úshin ózekti bolyp tabylady. Osy óńirlerdegi shekaradan ótý tártibin jeńildetý belsendi saýda-sattyqty damyta túsýge de septigin tıgizedi», dedi komıssııanyń teń tóraǵasy Dýma depýtaty Oleg Savchenko.

Osyǵan oraı, komıssııa músheleri atalǵan bastamany qoldap, buny talqylaýdy otyrystyń kún tártibine engizdi. Sonymen birge, eki memlekettiń vızalyq tártipti jeńildetýge baılanysty máseleni talqylaýǵa Syrtqy ister mınıstrligi men Eńbek jáne halyqty áleýmettik qorǵaý mınıstrliginiń ókilderi shaqyrylatyn bolady.