Qazaqstan men Reseı ózara taýar aınalymyn arttyrý máselesine basa nazar aýdarmaq
ASTANA. KAZINFORM – QR Premer-mınıstriniń orynbasary – ulttyq ekonomıka mınıstri Serik Jumanǵarın Reseı Federatsııasynyń Qazaqstandaǵy Tótenshe jáne Ókiletti Elshisi Alekseı Borodavkınmen kezdesti. Bul týraly Úkimettiń baspasóz qyzmeti habarlady.
Taraptar qarashanyń birinshi onkúndiginde, Oral qalasynda Qazaqstan men Reseıdiń XXI Óńiraralyq yntymaqtastyq forýmy qarsańynda ótkiziletin Yntymaqtastyq jónindegi úkimetaralyq komıssııanyń 26-otyrysyna daıyndyqty talqylady. Aldaǵy forýmnyń taqyryby – «Jumysshy mamandyǵy – ekonomıkalyq ósýdiń draıveri».
Otyrystyń jáne forýmnyń sheńberinde ózara is-qımyldaǵy basym baǵyttar – saýda-ekonomıkalyq yntymaqtastyq, ónerkásip, energetıka, kólik jáne logıstıka, sondaı-aq basqa da salalardy qamtıtyn ekijaqty kelisimder paketine qol qoıylady dep josparlanyp otyr.
Kezdesýge qatysýshylar ózara taýar aınalymyn arttyrý máselesine erekshe nazar aýdardy. Reseı Qazaqstannyń iri saýda jáne ınvestıtsııalyq áriptesiniń biri bolyp qala beredi.
2024 jylǵy qorytyndy boıynsha eki el arasyndaǵy taýar aınalymy $27,8 mlrd-tan asyp, ótken jylmen salystyrǵanda 3%-ǵa ósti. 2025 jyldyń 7 aıyndaǵy kórsetkish – $14,4 mlrd. Bul 2024 jylǵy sáıkes kezeńnen 7,2%-ǵa tómen. Osyǵan baılanysty taraptar ózara saýdany turaqtandyrý jáne odan ári arttyrý sharalaryn talqylady.
Sonymen qatar Qazaqstan-Reseı shekarasyndaǵy kóliktik logıstıka, onyń ishinde keptelis máselesi de qaraldy. Eki tarap ta týyndaǵan qıyndyqty birlesip ári jedel retteýge daıyn ekenderin jetkizdi.