Qazaqstan men Reseı óńirleri memleketaralyq qarym-qatynasty damytýda aıryqsha rólge ıe - Bojko
ASTANA. QazAqparat - Qazaqstan men Reseı óńirleri memleketaralyq qarym-qatynasty damytýda aıryqsha rólge ıe. Bul týraly búgin elordada ótip jatqan QR Parlamenti Májilisi men RF Federaldy jınalysynyń Memlekettik dýmasy komıtetteriniń kezdesýinde Májilis tóraǵasynyń orynbasary Vladımır Bojko aıtty, dep habarlaıdy QazAqparat.
«7600 shaqyrymdy quraıtyn Qazaqstan-Reseı shekarasy postkeńestik keńistikte ǵana emes, sonymen birge búkil álemdegi eń uzyn sanalady. Qazaqstannyń 7 oblysy Reseıdiń 12 óńirimen shektesedi. Buǵan qosa, Reseı Federatsııasynyń 85 sýbektisiniń 76-sy qazaqstandyq seriktestermen tikeleı saýda-ekonomıkalyq baılanystardy jolǵa qoıǵan. Búginde óńiraralyq saýdaǵa ekijaqty taýar aınalymynyń shamamen 70 paıyzy tıesili», - dedi Bojko.
Onyń aıtýynsha, eki eldiń memleket basshylarynyń qatysýymen Qazaqstan-Reseıdiń óńiraralyq yntymaqtyq forýmyn jyl saıyn ótkizý de jaqsy dástúrge aınalǵan.
«Qazaqstan men Reseı óńirleri memleketaralyq qarym-qatynasty damytýda barlyq údemeli rólge ıe desek, asyra aıtqandyq bolmas. Óńirlik deńgeıdegi Qazaqstan men Reseıdiń ózara is-qımylyndaǵy ózekti máselelerge eki el prezıdentteriniń qatysýymen 10 kúnnen keıin, 9 qarashada Chelıabide ótetin Óńiraralyq yntymaqtastyqtyń 14-shi forýmy arnalatyn bolady»,- dedi ol.
