Qazaqstan men Reseı memleketaralyq temirjol túıisý pýnktterin jańǵyrtpaq

ASTANA. KAZINFORM — QTJ men RJD memleketaralyq túıisý pýnktterin damytý týraly kelisimge qol qoıdy, dep habarlaıdy «Qazaqstan temir joly «UK» AQ baspasóz qyzmeti.

— Qazaqstan Respýblıkasynyń Prezıdenti Qasym-Jomart Toqaevtyń Reseı Federatsııasyna resmı sapary aıasynda «Qazaqstan temir joly «UK» AQ men «Reseı temir joldary» AAQ arasynda 2030 jylǵa deıin memleketaralyq túıisý pýnktterin damytý týraly kelisimge qol qoıyldy. Qujat shekara mańy ınfraqurylymyn jańǵyrtý, júk aǵynynyń ósýin eskere otyryp, temirjol ótkelderiniń ótkizý qabiletin arttyrý boıynsha birlesken jumysty kózdeıdi, — delingen kompanııa taratqan aqparatta.

Kelisimge «QTJ «UK» AQ Basqarma tóraǵasy Talǵat Aldybergenov pen «RJD» AAQ Bas dırektory — basqarma tóraǵasy Oleg Belozerov qol qoıdy. 

Táýelsizdik jyldary Qazaqstan men Reseı arasyndaǵy toǵyz memleketaralyq ótkizý pýnkti arqyly 3 mlrd tonnadan astam júk tasymaldandy. 2025 jyldyń 10 aıynyń qorytyndysy boıynsha eki el arasyndaǵy tasymal kólemi 71,6 mln tonnany qurady, bul ótken jylmen salystyrǵanda 5%-ǵa joǵary. Qazaqstan men Reseı temirjol ınfraqurylymyn damytý boıynsha birlesken jobalardy iske asyryp jatyr.

Aǵymdaǵy jyly Dostyq-Moıynty ýchaskesinde ekinshi joldyń qurylysy aıaqtaldy, bul shyǵys baǵytynyń ótkizý qabiletin aıtarlyqtaı arttyrdy. Tsıfrlyq tehnologııalar belsendi túrde engizilip keledi.

2025 jylǵy qazanda elektrondyq zańdyq mańyzy bar júkqujattar boıynsha tasymaldar úlesi 84 -ǵa jetti, 2026 jylǵa qaraı kórsetkishti 90%-ǵa deıin jetkizý josparlanyp otyr. 

Budan buryn Qazaqstan men Reseı «Soıýz-5» jáne «Báıterek» zymyran keshenderiniń ushý synaqtaryn ótkizý jónindegi komıssııa qurýǵa ýaǵdalasqanyn jazǵan edik.