Qazaqstan men Reseı qurylys salasynda eko-halal standarttaryn ázirlemek
ASTANA. QazAqparat - Qazaqstan men Reseı qurylys salasynda eko-halal standarttaryn ázirlemek. Bul týraly «QazAqparatqa» QMDB-nyń apparat basshysy Ǵylymbek Májıev habarlady.
«Jaqynda Reseı Múftıler keńesiniń ekologııalyq damý jónindegi komıssııasynyń tóraǵasy, Jasyl standarttar ortalyǵynyń (ÚEU) dırektory Rashıd Ismaılovpen kezdesý barysynda ıslam ekologııalyq etıkasy uǵymyn talqyladyq. Atap aıtqanda, osy kelissózder aıasynda reseılik tarappen birlese TMD aýmaǵynda áriptestik deńgeıine shyǵýdy kózdep otyrmyz. Osy rette «ekologııalyq halal» uǵymyn negizge alyp otyrmyz. Bul turǵyda taǵam, azyq-túlik salasynda ǵana emes, sonymen qatar qurylys salasynda taza ónimderdi paıdalanyp, qorshaǵan ortaǵa zııan keltirmeý baǵyty qamtylyp otyr. Rashıd Ismaılov myrza qurylys salasyna «jasyl» standarttardy keńinen engizý qadamdaryn belsendi atqarýǵa shaqyryp otyr. Biz óz kezegimizde reseılik ortalyqpen birlese otyryp, «jasyl» standarttardy turǵyn úı, jol qurylysy salasyna engizýdi nazarǵa aldyq», - dedi ol.
Onyń aıtýynsha, kezdesý nátıjesi boıynsha taraptar aldaǵy ýaqytta jasyl standart mekemesimen ózara yntymaqtastyq boıynsha tıisti qujatty bekitýge ýaǵdalasty.
«Jalpy, óńirimizde eko-halal túsinigin damytý qajet bolyp tur. Qurylys salasynda eń aldymen kún jáne jel energııasyn paıdalaný, tabıǵatqa barynsha zııanyn az keltiretin materıaldardy paıdalaný, qorshaǵan ortany lastamaý, osy materıaldardy qurylys alańyna deıin taza kúıinde jetkizýdegi standarttar eskerilip otyr. Jalpy, búginde jańa bastamany qolǵa alyp jatyrmyz. Biz birlesip ekologııalyq standarttardy daıarlap, ózimizdiń usynystardy jasaýdy kózdep otyrmyz. 2016 jyldyń sońyna deıin qajetti qujatty qabyldap, odan keıin tıisti qadamdardy jasamaqpyz», - dedi Ǵylymbek Májıev.
Reseı Múftıler keńesi baspasóz qyzmetiniń málimetinshe, qazaqstandyq jáne reseılik taraptar «Eko-halaldy» damytý baǵytynda aqparattyq almasýdy retke keltirýdi, sondaı-aq yntymaqtastyq formatyn qarastyrý boıynsha kelisimge keldi.
Rashıd Ismaılovtyń sózine qaraǵanda, Qazaqstan men Ortalyq Azııa ıslam ekologııalyq etıkasy ustanymdaryn sátti engizýde, jasyl tehnologııalardy damytýda perspektıvaly óńir bolyp tabylady. Sonymen qatar bul bastamalarǵa búginde Qazaqstannyń sońǵy jyldary «jasyl» ekonomıkany damytýdaǵy qarqyndy qadamdary tyń serpin beredi.
