Qazaqstan men Reseı quramalarynyń joldastyq kezdesýinde esep ashylmady
ASTANA. QazAqparat - Máskeýde Qazaqstan men Reseı quramalary joldastyq match ótkizdi, dep jazady alaman.kz.
Matchtyń birinshi taımynda tablodaǵy esep ózgergen joq. Qazaqstan quramasy qorǵanys pen shabýyldy qatar alyp júrýge tyrysty. Qos komanda birinshi taımdaǵy jasaǵan qaýipti soqqylarynyń sany - 6:3 boldy.
Reseı quramasy birinshi taım ortasynda Qazaqstan qaqpasyna bir márte qaýip tóndirgenimen Stas Pokatılov oıyndy qutqaryp qaldy.
Ekinshi taımdy Qazaqstan óte belsendi bastady. Baýyrjan Islamhan eki birdeı qorǵaýshyny aldap ótip, tepken doby baǵanadan sál bıik ketti. 48 mınýtta Lodygın ózine tıisti aımaqtan shyǵyp, dop ustaǵany úshin tóreshi aıyp alańynyń syrtynan aıyp dobyn belgiledi. Biraq Samat Symaqov tepken aıyp doby qorǵaýshylarǵa tıip, keri serpildi.
58 mınýtta Baýyrjan Islamhan Reseı aıyp alańyna erkin enip, komandalastaryna ádemi pas shyǵaryp bergen. Biraq bul múmkindikti Toqtar Jańǵylyshbaı paıdalana almady. 70 mınýtqa deıin alań ıeleri Pokatılov qorǵaǵan qaqpaǵa birneshe márte shabýyl uıymdastyrýǵa tyrysqanymen qorǵaýshylar sátti qorǵana bildi. 74 mınýtta Georgıı Jýkov ta Lodygın qaqpasyna jaqyn mańnan soqqy jasaǵan. Aıtpaqshy, Jýkov ulttyq qurama sapyndaǵy alǵashqy oıynyn ótkizdi.
90 mınýtqa deıin qos komanda utymdy shabýyl uıymdastyrǵanymen qorǵanys syr bergen joq. Tóreshi qosqan úsh mınýtta da tablodaǵy 0:0 esebi ózgermedi. Qazaqstan bıylǵy maýsymdaǵy ekinshi joldastyq kezdesýin teń aıaqtady. Osyǵan deıin Krasnojan baptaıtyn qurama Moldovamen teń túsken - 1:1.
Máskeýdegi matchtqa Reseıde turatyn júzden astam qazaqstandyq arnaıy kelip tamashalady.
2008 jyly Qazaqstan Reseımen joldastyq match ótkizip, 0:6 esebimen jeńilgen.
