Qazaqstan men Reseı kúndelikti sý deńgeıi týraly aqparat almasyp otyrady
ASTANA. KAZINFORM — Sý tasqyny kezeńindegi ózara is-qımyl máseleleri boıynsha Qazaqstan-Reseı birlesken jumys tobynyń IV otyrysy ótti. Qazaqstan men Reseı Jaıyq, Tobyl, Esil jáne Ertis ózenderi basseınderindegi sý tasqynyna daıyndyqty talqylady, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Qazaqstandyq delegatsııany QR SRIM Sý resýrstaryn retteý, qorǵaý jáne paıdalaný komıteti tóraǵasynyń orynbasary Gúlmıra Imasheva basqardy. Reseı tarapynan Reseı Federatsııasynyń Sý resýrstary federal agenttiginiń sý sharýashylyǵy qyzmetin retteý basqarmasynyń basshysy Dmıtrıı Savostıtskıı qatysty.
Otyrysta taraptar gıdrometeorologııalyq jaǵdaıdy eskere otyryp, aldaǵy kóktemgi sý tasqynynyń boljamdary men erekshelikterin talqylady. Sondaı-aq sý qoımalaryna keletin sý kólemin aldyn ala baǵalaý negizinde Jaıyq, Tobyl, Esil jáne Ertis ózenderi basseınderinde tasqyn sýdy ótkizý stsenarııleri kelisildi.
Taraptar 2026 jylǵy 2 naýryzdan bastap sý qoımalarynyń jumys rejımderi men gıdrobeketterdegi sý deńgeıleri týraly kúndelikti aqparat almasýdy bastaýǵa kelisti.
— Qazir biz reseılik áriptesterimizben birge transshekaralyq ózender basseınderindegi sý sharýashylyǵy jaǵdaıyn muqııat baqylap otyrmyz. Sý qoımalarynda tasqyn sýdy qabyldaýǵa daıyndyq júrgizilip jatyr, — dedi SRIM Sý resýrstaryn retteý, qorǵaý jáne paıdalaný komıteti tóraǵasynyń orynbasary Gúlmıra Imasheva.
Budan buryn Jetisýda sý tasqyny kezeńi ádettegiden erte bastalǵanyn jazǵan edik.