Qazaqstan men Reseı Kaspıı teńiziniń soltústik bóligindegi ken ornyn birlese zertteıdi - Májilis
Atalǵan kelisim Qazaqstan men Reseınyń, olardyń ýákilettik tulǵalary arasyndaǵy Qurmanǵazy (Qazaqstan) ken ornyn, Tsentralnyı jáne Hvalynskoe (Reseı) ken qurylymdaryn, Kaspıı teńiziniń soltústik bóliginiń túbin birlesip ıgerý boıynsha qyzmettiń quqyqtyq negizderin bekitedi.
«2015 jyly eki el basshylary Tsentralnyı geologııalyq qurylymyn jete barlaý quqyǵyn bólý jónindegi ózgeristerdi qamtyǵan hattamaǵa qol qoıǵan bolatyn. Tsentralnyıdyń qurylymy Kaspıı teńiziniń soltústik bóliginde, Aqtaý qalasynyń ońtústik batysyna qaraı 150 shaqyrym, Astrahan qalasynan 440 shaqyrym qashyqtyqta Reseı sektorynda ornalasqan. Jumys ýchaskesindegi sý tereńdigi 350-500 metrdi quraıdy. Reseı tarapynyń aldyn ala derekteri boıynsha qurylymda 90 mln tonna munaı, sonyń ishinde S-1 sanaty boıynsha - 6 mln tonna, S-2 sanaty boıynsha 84 mln tonna munaıdy quraıdy», - dedi Energetıka vıtse-mınıstri Áset Maǵaýov.
Onyń aıtýynsha, ózgerister negizinen Reseıdiń Jer qoınaýyn paıdalaný jónindegi federaldyq agenttiginiń birlesken kásiporynyna «Neftegazovaıa Kompanııa Tsentralnaıa» JShQ jete barlaý júrgizýge lıtsenzııa alýǵa ýájdemelik bas tartýǵa qatysty bolyp otyr. Reseı zańnamasyna sáıkes, jete barlaý bóliginde shekteýler belgilengen. Atap aıtqanda, geologııalyq zertteýlerge qatysty jalpy merzimi men barlady uzartý múmkindigin qarastyrmaıdy jáne bes jyl merzimge beriledi. «Osyǵan baılanysty hattamaǵa ózgerister engizilip otyr. Tutastaı alǵanda, Tsentralnyı qurylymyn ıgerý Kaspıı teńiziniń soltústik bóligin ıgerý kezindegi geologııalyq aqparattar alýǵa, qazaqstandyq kadrlar úshin jańa jumys oryndaryn qurýǵa múmkindik beredi. Bul teńiz jobalarynda jumys istegen kezde kadrlardyń básekege qabilettiligin shyńdaıdy. Qarjylandyrýdy Reseı tarapy tolyqtaı ózine alady», - dedi Á. Maǵaýov.
