Qazaqstan men Reseı ishki ister mınıstrlikteri esirtki satatyn transulttyq arnany joıdy

NUR-SULTAN. QazAqparat - Qazaqstan men Reseı Іshki ister mınıstrlikteriniń esirtki qylmysyna qarsy is-qımyl jónindegi bólinisteri sıntetıkalyq esirtkilerdi poshta jóneltilimderi arqyly jetkizý arnasynyń jolyn kesý baǵytynda eki el aýmaǵynda arnaıy operatsııa júrgizdi, dep habarlaıdy QazAqparat Polisia.kz saıtyna silteme jasap.

ІІM Esirtki qylmysyna qarsy is-qımyl departamenti bastyǵynyń mindetin atqarýshy Asqar Muhametqalıevtiń aıtýynsha, esirtki tasymalyn jedel quryqtaý úshin vedomstvonyń ortalyq apparatynyń, polıtsııa departamentteri men Jambyl oblysy boıynsha UQK-niń tájirıbeli qyzmetkerleri arasynan arnaıy top quryldy.

«Omby jáne Taraz qalalarynda bir mezgilde júrgizilgen is-sharalar nátıjesinde polıtseıler Reseı Federatsııasyndaǵy sıntetıkalyq esirtkilerdiń negizgi jóneltýshisin jáne Qazaqstanda ony qabyldap alýshyny ustady. Fıgýranttardyń turǵylyqty jerin tintý barysynda iri esirtki zerthanalary anyqtaldy. Ustalǵan – Omby qalasynyń turǵyny «sıntetıkany» daıyndap, poshta jóneltilimderi arqyly Ortalyq Azııa elderine, onyń ishinde Qazaqstanǵa jiberip otyrǵan. Ol jalǵan qujattardy paıdalanyp, sálemdemelerdi túrli taýarlar – kólik maıy, turmystyq hımııa jáne t.b. túrinde jasyrǵan», - dep jazylǵan aqparat kózinde.

Polıtseıler jalpy somasy 9,5 mln astam AQSh dollary bolatyn 260 kg qoldanýǵa daıyn esirtkini tárkiledi. 2021 jyldyń qazany men bıylǵy sáýir aralyǵynda júrgizilgen arnaıy operatsııa nátıjesinde polıtsııa qyzmetkerleri Almaty, Altaı, Aqtóbe, Atyraý, Taraz jáne Qyzylorda qalalarynda sıntetıkalyq esirtki óndirýmen jáne taratýmen aınalysqan Qazaqstannyń 13 azamatyn ustady.