Qazaqstan men Reseı Irıkla sý qoımasy boıynsha jumys rejımin kelisti

NUR-SULTAN. QazAqparat - Orynbor qalasynda Irıkla sý qoımasynyń jumys rejimin retteý jónindegi vedomstvoaralyq jumys tobynyń otyrysy aıasynda Qazaqstan Respýblıkasy Ekologııa, geologııa jáne tabıǵı resýrstar vıtse-mınıstri Serik Qojanııazov jáne Federaldyq sý resýrstary agenttiginiń basshysynyń orynbasary Vadım Nıkanorov arasynda ekijaqty kezdesý ótti.

Bul týraly QazAqparat QR Ekologııa, geologııa jáne tabıǵı resýrstar mınıstrliginiń Telegram kanalyna silteme jasap habarlaıdy.

Kezdesý barysynda taraptar Jaıyq ózeni basseınindegi jaǵdaı men gıdrologııalyq boljamdy eskere otyryp, Irıkla sý qoımasynyń josparlanǵan jumys kestesin talqylady.

Jaıyq ózeniniń aǵynyn jedel baqylaýdy qamtamasyz etý maqsatynda taraptar Irıkla, Aqtóbe jáne Qarǵala sý qoımalarynyń jumys rejımderi týraly málimettermen kúndelikti almasyp otyrýǵa kelisti.

Sonymen qatar, taraptar 2020 jylǵy qazan aıynda Transshekaralyq sý nysandaryn birlesip paıdalaný jáne qorǵaý jónindegi Qazaqstan-Reseı birlesken komıssııasynyń 28-shi otyrysynda bekitilgen Jaıyq, Ertis jáne basqa ózenderdiń basseınderinde zertteýler júrgizý boıynsha biryńǵaı jol kartasynyń is-sharalaryn júzege asyrý barysyn talqylady.

Talqylaý nátıjesinde aldyn-ala zertteý derekterimen almasý jáne Biryńǵaı jol kartasynyń sharalaryn iske asyrý boıynsha, odan ári jumystardy anyqtaý úshin taraptardyń sarapshylarynyń kezdesýin jaqyn arada ótkizý týraly sheshim qabyldandy.