Qazaqstan men Reseı yntymaqtastyǵy barlyq salada senimdi túrde damyp keledi — Qasym-Jomart Toqaev
ASTANA. KAZINFORM — Qazaqstan men Reseı yntymaqtastyǵynda eshqandaı problema joq. Bul týraly elimizge memlekettik saparmen kelgen Reseı Prezıdenti Vladımır Pýtınmen keńeıtilgen quramdaǵy kelissózder barysynda Memleket basshysy Qasym-Jomart Toqaev aıtty.
— Jańa ǵana shaǵyn quramdaǵy kelissózder ótip, ózara yntymaqtastyqtyń kún tártibinde problema joq ekeni naqtylandy. Bul óz kezeginde, jumys formatyndaǵy birlesken is-qımyldyń nátıjesi. Qol qoıylatyn nemese bekitilýi tıis negizgi kelisimderdiń tıisti deńgeıde daıyndalǵanyn rastaımyz, — dedi Qasym-Jomart Toqaev.
Osy oraıda Memleket basshysy Reseı Prezıdentiniń Qazaqstanǵa saparyn eki memleket arasyndaǵy qarym-qatynastyń erekshe sıpatyn bildiretinin, Qazaqstan úshin Reseımen dostyq ári tyǵyz qarym-qatynastyń mańyzy zor ekenin atap ótti.
— Osy yntymaqtastyqtyń mańyzyn sizder de jáne biz de jaqsy túsinemiz. Birlesken kúsh-jigerdiń arqasynda ekijaqty yntymaqtastyq barlyq salada senimdi túrde damyp keledi ári ony memleketaralyq baılanystardyń naǵyz úlgisi dep ataýǵa bolady. Biz shaǵyn quramda nátıjeli kelissóz júrgizip, san qyrly seriktestigimizdi nyǵaıtýǵa nıetti ekenimizdi rastadyq. Elderimizdiń arasynda eshqandaı sheshilmegen másele joq, — dedi Qazaqstan Prezıdenti.
Buǵan deıin habarlanǵandaı, Memleket basshysy Qasym-Jomart Toqaevtyń elimizge memlekettik saparmen kelgen Reseı Prezıdenti Vladımır Pýtındi Táýelsizdik saraıynda resmı qarsy alý rásimi ótti.
