Qazaqstan men Reseı elektrondy júkqujat arqyly júk tasymaldaýǵa kóshedi
ASTANA. KAZINFORM — Búgin Qazaqstan men Reseı júk tasymalyn elektrondy qujatpen rásimdeýdi bastaıdy. Bul týraly Astanada ótip jatqan New Silk Way halyqaralyq forýmynda Eýrazııalyq ekonomıkalyq komıssııa Alqasynyń kólik jáne ınfraqurylym jónindegi múshesi Arzybek Kojoshev málimdedi.
Onyń aıtýynsha, Eýrazııalyq ekonomıkalyq odaq elderi avtomobıl kóligimen júk tasymaldaý kezinde qaǵaz qujattardy elektrondy nusqaǵa aýystyrý jumystaryn júrgizip jatyr.
— Avtomobıl kóligi salasynda elektrondy CMR júkqujattaryn qoldaný baǵytynda belsendi jumys atqarylyp jatyr. Búgin forým aıasynda tústen keıin Qazaqstan men Reseı arasynda tsıfrlyq qujat paıdalanylatyn alǵashqy tasymaldy synaqtan ótkizemiz, — dedi Arzybek Kojoshev.
Elektrondy júkqujattardy engizý tasymalǵa qatysty málimetterdi tsıfrlyq formatta rásimdeýge jáne taraptar arasynda qujat almasýdy jeńildetýge múmkindik beredi.
EEK ókiliniń aıtýynsha, halyqaralyq júk tasymalynda tsıfrlyq tehnologııalardy qoldaný ásirese shekaradan ótý kezinde mańyzdy.
Óıtkeni qujattardy rásimdeýge ketken ýaqyt taýar jetkizý merzimine jáne tasymaldaýshylardyń shyǵynyna áser etedi.
— Geosaıası turaqsyzdyq pen joǵary báseke jaǵdaıynda árbir kidiris pen bos turyp qalý tasymal qunyn arttyryp qana qoımaı, taýardyń jetkizýshiden tutynýshyǵa jetýin baıaýlatady, — dedi ol.
Eske salaıyq, elordada Qazaqstannyń Kólik aptalyǵy aıasynda «NEW SILK WAY» VIII halyqaralyq bıznes-forýmy ótip jatyr. Atalǵan is-shara — kólik-logıstıka salasyn damytýdyń ózekti máselelerin talqylaýǵa, halyqaralyq yntymaqtastyqty nyǵaıtýǵa jáne Eýrazııanyń kólik dálizderiniń tıimdiligin arttyrýǵa arnalǵan negizgi halyqaralyq alańdardyń biri.
Bıyl forým Qazaqstan men 39 ózge memleketterden kelgen ókilderdiń basyn qosty. Іs-sharaǵa memlekettik organdardyń, halyqaralyq uıymdardyń, kólik-logıstıkalyq kompanııalardyń, salalyq birlestikter men sarapshylar qaýymdastyǵynyń 2 000-ǵa jýyq ókili qatysady dep kútilýde. Qatysýshylar qatarynda 338 uıymnyń ókilderi bar.
Aıta keteıik, buǵan deıin Qazaqstan júk tasymalyn JI arqyly basqarýdy josparlap otyrǵany habarlandy.
