Qazaqstan men Reseı depýtattary Astana protsesiniń rólin talqylady
«Bizdiń búgingi talqylaý barysynda mindetti túrde atap ótilýi tıis bir taqyrypty qosqym keledi. Bul taqyryp Sırııadaǵy ahýalǵa baılanysty Astana protsesi týrasynda bolmaq. Atap aıtqanda, qıyn jaǵdaıdy retteý sharalarynyń eń kúrdeli kezeńinde Astana óziniń qoldaýyn kórsetti», - dedi RF Federaldyq Jınalysy Federatsııa Keńesi halyqaralyq ister jónindegi komıtetiniń tóraǵasy Konstantın Kosachev.
Osy oraıda ol Qazaqstannyń elordasy osyǵan deıin mazmundy, konstrýktıvti ári turaqty sheshimder daıyndalatyn alań retinde ózin tanyta alǵanyn aıta kele, aldaǵy ýaqytta da Astana osyndaı kúrdeli máselelerde senimdi alań bolýǵa qaýqarly ekenin atap ótti.
Óz kezeginde QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva Sırııadaǵy ahýaldy retteýdegi Qazaqstannyń úlesin joǵary baǵalaǵan áriptesine alǵysyn bildirdi.
«Sırııalyq baǵyttaǵy yntymaqtastyq óte mańyzdy sıpatqa ıe. Siz Astana protsesi jóninde atap óttińiz. Shynymen de Astana protsesiniń qosqan eleýli úlesin maqtan tutamyz. Sonymen qatar biz sırııalyq máselede Reseıdiń de rólin joǵary baǵalaımyz», - dedi Darıǵa Nazarbaeva.
Budan buryn habarlanǵandaı, ótken jyldyń sońynda BUU Qaýipsizdik Keńesi músheleri Sırııa kelissózderinde Astana protsesin joǵary baǵalaǵan edi.
