Qazaqstan men Reseı COVID-19-ǵa qarsy vaktsınany birlese shyǵarý máselesin pysyqtaýda
NUR-SULTAN. QazAqparat - Qazaqstan men Reseı COVID-19-ǵa qarsy vaktsınany birlese shyǵarý máselesin pysyqtaýda. Bul týraly QR Densaýlyq saqtaý vıtse-mınıstri - Bas memlekettik sanıtar dáriger Erlan Qııasov aıtty, dep habarlaıdy QazAqparat tilshisi.
Aıta keterligi, keshe Qazaqstan Prezıdenti Qasym-Jomart Toqaev pen Reseı Prezıdenti Vladımır Pýtın telefon arqyly sóılesken bolatyn. RF Prezıdentiniń resmı saıty taratqan aqparatqa qaraǵanda, taraptar áńgimelesý barysynda koronavırýs pandemııasymen kúres, onyń ishinde Qazaqstan aýmaǵynda birlesken vaktsına óndirisin uıymdastyrý jospary talqylanǵan. Al búgin Ortalyq kommýnıkatsııalar qyzmetindegi baspasóz máslıhaty barysynda BAQ ókilderi vıtse-mınıstrden vaktsına óndirisine qatysty jospar jaıynda suraǵan edi.
«Keshe Memleket basshylary telefon arqyly áńgimelesý barysynda bul máseleni kóterdi. Búgingi kúni bul másele pysyqtalýda. Bul ıdeıa bir kún buryn ǵana týǵan edi. Sondyqtan dál qazir naqty eshteńe aıta almaımyn», - dep jaýap berdi Erlan Qııasov.
Buǵan deıin QR Densaýlyq saqtaý vıtse-mınıstri - Bas memlekettik sanıtarııalyq dáriger elimiz koronavırýspen kúres úshin satyp alynýy múmkin 3 vaktsınany ataǵan edi.
