Qazaqstan men Reseı birlesken jobalardy 30 mlrd dollarǵa deıin ulǵaıtpaq
ORAL. KAZINFORM — Oral qalasynda Qazaqstan-Reseı XXI óńiraralyq yntymaqtastyq forýmy aıasynda «Jaıyq arena» sport kesheninde Qazaqstan kolledjderi men kásiporyndarynyń kórmesi ótkizildi.
Batys Qazaqstan oblysynyń ákimi Narıman Tóreǵalıevtiń málim etkenindeı, Jumysshy mamandyqtary jylyna arnalǵan bıylǵy forýmǵa elimizden 14 kolledj qatysyp jatyr. Sonyń tórteýi Batys Qazaqstan oblysynan.
Onyń sózine qaraǵanda, Qazaqstan-Reseı óńiraralyq yntymaqtastyq forýmy 20 jyldan astam ýaqyt boıy dástúrli túrde ótkizilip keledi. Al Batys Qazaqstan oblysynda ekinshi ret uıymdastyrylyp otyr. Budan 19 jyl buryn, 2006 jyly úshinshi forým ótkizilgen. Mundaı basqosýdyń bereri kóp.
— Eki memlekettiń arasynda ekonomıkalyq jáne saýda baılanysy artyp keledi. Oǵan dálel — sońǵy úsh jylda oblystyń Reseımen syrtqy saýda aınalymy 2 mlrd AQSh dollarynan asty. Búginde óńirde sheteldikterdiń qatysýymen 2 myńnan astam kompanııa jumys istese, sonyń 50 paıyzy — reseılik kompanııalar. Qazirgi tańda óńirdegi barlyq kolledj iri kásiporyndarmen dýaldy oqytý arqyly tikeleı baılanysta. Sonyń nátıjesinde stýdentter teorııalyq bilimderin naqty ispen dáleldep, memleketimizge qajet mamandar daıarlanyp jatyr. Memleket basshysynyń qoldaýymen Reseımen shekaradaǵy óńirimizdegi eń iri «Syrym» avtomobıl ótkizý beketin bıyl jańǵyrtý jumystary bastaldy. Aldaǵy jyly «Tasqala» beketin jańǵyrtý josparlanyp otyr. Bul tek logıstıkalyq tıimdilikti arttyryp qana qoımaı, eki el arasyndaǵy baılanystardy odan ári nyǵaıtýǵa, saýda aǵynyn arttyrýǵa jáne óńirimizdiń áleýmettik-ekonomıkalyq damýyna jańa serpin beredi, — dedi oblys basshysy.
Saýda jáne ıntegratsııa mınıstri Arman Shaqqalıev forým ekonomıkadan bastap gýmanıtarlyq, ǵylymı jáne mádenı baılanystarǵa deıin barlyq salany qamtıtynyn atap ótti.
Onyń aıtýynsha, búgingi kórmeden energetıka, kólik, logıstıka, IT-sektor, aýyl sharýashylyǵy ónimderin óńdeý sekildi salalardaǵy Qazaqstannyń ozyq tehnologııaǵa negizdelgen kásiporyndarynyń jetistikterin kórýge bolady. Qatysyp jatqandardyń basym bóligi — jastar. Osyndaı kórme arqyly reseılik kórshiler qandaı baǵytta baılanysty damytýǵa bolatyndyǵyn kóre alady.
— Reseı saýda-ekonomıkalyq saladaǵy negizgi strategııalyq áriptes bolyp qala beredi. Sońǵy bes jylda taýar aınalymy 50 paıyzdan astamǵa artty. Ótken jyly 28 mlrd AQSh dollarynan asty. Taıaý ýaqytta taýar aınalymyn 30 mlrd dollarǵa jetkizý kózdelip otyr. Búgingi tańda birlesken iri jobalar júzege asyrylýda. Qazirdiń ózinde 4,4 mlrd dollarǵa 14 joba máresine jetti. Aldaǵy ýaqytta 30 mlrd astam dollarǵa 30-dan astam joba qolǵa alynbaq. Bul salyqtyq túsimdi molaıtyp, 30 myńnan astam jańa jumys ornyn ashýǵa múmkindik beredi. Budan bólek, eki eldiń áleýetin paıdalana otyryp, bilim berý salasynda da birlesken jobalar iske asyrylýda. 50 myńnan astam qazaqstandyq stýdentter Reseı Federatsııasynda bilim alyp jatyr. Sol sekildi 2 myńdaı reseılik jas Qazaqstanda oqyp jatyr. Munyń bári bizdiń baılanystarymyzdyń budan bylaı da nyǵaıa túsetindigin kórsetedi, — dedi Arman Shaqqalıev.
Eske sala keteıik, budan buryn Oralda Qazaqstan-Reseı kásipkerleri óńiraralyq yntymaqtastyqty damytý joldaryn talqylaǵanyn jazǵan edik.