Qazaqstan men Reseı bıznes-ombýdsmenderi kásipkerliktiń damý erekshelikterin talqylady

NUR-SULTAN. QazAqparat - Qazaqstan kásipkerleriniń quqyqtaryn qorǵaý jónindegi ýákil Rýstam Júrsinov reseılik áriptesi Borıs Tıtovpen kezdesti. Bıznes-ombýdsmender eki eldegi ákimshilik retteýdiń erekshelikterin, sondaı-aq EýrAzEQ sheńberindegi kásipkerlerdiń ekonomıkalyq yntymaqtastyǵynyń perspektıvalaryn talqylady, dep habarlaıdy QazAqparat ombudsmanbiz.kz-ke silteme jasap.

Rýstam Júrsinov Qazaqstanda pandemııa bastalysymen tekserýlerge engizilgen moratorıı 2023 jylǵa deıin jalǵasatynyn aıtty: «Sodan keıin «taza paraqtan retteý« jobasy aıasynda jańa tásilderdi engizý josparlanyp otyr. Eski normatıvtik talaptar tolyǵymen alynyp tastalady, al jańalary bılik pen bıznes arasynda tóreshi retinde qyzmet etetin sarapshylardyń qatysýymen jasalady».

Ol sondaı-aq Qazaqstanda 1 shildeden bastap kúshine engen jańa Ákimshilik rásimdik-protsestik kodekske sáıkes, memleket pen kásipker arasynda daý týyndaǵan jaǵdaıda, kásipker aqtalýǵa tıis emes, kerisinshe, memleket kásipkerdiń buzýshylyqqa jol bergenin dáleldeýi tıis ekenin habarlady.

Óz kezeginde Borıs Tıtov Reseıde retteýshi gılotına boıynsha kóptegen top jumys istep jatqanyna qaramastan, eńbek zańnamasyndaǵy, fıtosanıtarııalyq baqylaýdaǵy jáne basqa da qujattardaǵy eskirgen talaptardyń bir bóligi áli de saqtalǵanyn aıtty. Sonymen qatar, reseılik sot júıesine jasandy ıntellektti engizý máselesi jolǵa qoıyldy.

- Jasandy ıntellektti engizý sharýashylyq sharttardy jasaýǵa jáne tekserýge jumsalatyn eńbek shyǵyndaryn únemdeý esebinen bıznestiń shyǵyndaryn tómendetedi. Sharttarda zańdarǵa silteme jasalady, aqparattyq júıe olardy tekseredi jáne bul tekserý zańdy mánge ıe bolady. Іshinara avtomattandyrý arqasynda sot júıesi jeńildeıdi, onda eń mańyzdy jáne kúrdeli ister úshin resýrstar bosatylady, - dedi Borıs Tıtov.

Tıtov retteýshi gılotına úshin de barlyq normatıvtik-quqyqtyq aktilerdi tsıfrlyq taldaý úshin jaramdy standarttalǵan túrge aýystyrý qajet ekenin atap ótti.