Qazaqstan men Reseı «Báıterek» jobasyn qarjylandyrýǵa qatysty hattamaǵa qol qoıdy

ASTANA. QazAqparat - Búgin «Ásker-2018» halyqaralyq forým alańynda QR Qorǵanys jáne aeroǵarysh ónerkásibi mınıstri Beıbit Atamqulov «Roskosmos» Ǵaryshtyq qyzmeti boıynsha memlekettik korporatsııanyń Bas dırektory Dmıtrıı Rogozınmen kezdesti, dep habarlaıdy Qazaqstan Respýblıkasy Qorǵanys jáne aeroǵarysh ónerkásibi mınıstrliginiń baspasóz qyzmeti.

Іs-shara aıasynda qazaqstandyq jáne reseılik taraptar «Baıqońyr» ǵarysh aılaǵynda «Báıterek» ǵaryshtyq zymyran keshenin (ǴZK) qurý jóninde Úkimetaralyq  kelisimge ózgerister men tolyqtyrýlar engizý týraly Hattamaǵa qol qoıdy.

Atalǵan qujatqa qol qoıýy qazaqstandyq tarapqa bul jobany qarjylandyrý máselesin sheshýge kirisýge múmkindik beretini atap ótildi.

Sonymen qatar, kezdesý sheńberinde eki jaq basqa da birlesken jobalardyń iske asý barysy men «Baıqońyr» keshenine ınvestıtsııalar tartý máselelerin talqylady.

Esterińizge sala keteıik, qazirgi ýaqytta qazaqstandyq delegatsııa 2018 jyldyń 21-26 tamyz aralyǵynda RF Máskeý oblysynyń Kýbınka qalasynda ótetin «Ásker-2018» IV Halyqaralyq áskerı-tehnıkalyq forýmynyń jumysyna qatysyp otyr. Qazaqstan Respýblıkasy qorǵanys-ónerkásip kesheniniń kásiporyndary eksporttyq potentsıaly bar qarý-jaraq pen áskerı tehnıkanyń jańa úlgilerin usynýda.

Aıta keteıik, «Báıterek» ǴZK qurý «Baıqońyr» ǵarysh aılaǵyndaǵy qazaqstandyq-reseılik negizgi birlesken ǵaryshtyq joba bolyp tabylady.

Atalǵan jobada qazaqstandyq jaǵy «Zenıt-M» ǴZK-niń jerústi ǵaryshtyq ınfraqurylymyn jańǵyrtý úshin jaýapty, al reseılik jaǵy orta tapty jańa «Soıýz-5» ZT qurý úshin jaýapty.
  

2017 jyldyń 13 maýsymda «Baıqońyr» kesheni boıynsha ÚAK 5-shi otyrysy barysynda reseılik tarap «Báıterek» ǴZK qurýyn jyldamdatýdy usyndy: onyń ushý synaqtaryn 2022 jyly bastaý jáne basqarylatyn ushyrýlardy júzege asyrý múmkindigin qarastyrý. Qazaqstandyq tarap bul usynysty qoldady. 

2017 jyldyń 12 jeltoqsanda 2017-2022 jyldarǵa arnalǵan «Báıterek» jobasyn iske asyrý boıynsha jol kartasy jáne «Báıterek» jobasyn iske asyrý sharttary bekitildi.

Qazirgi tańda «Baıqońyr» kesheni boıynsha ÚAK 5-shi otyrysynda qabyldanǵan sheshimderiniń negizinde qazaqstandyq jaǵy «Baıqońyr» ǵarysh aılaǵynyń 42, 43 jáne 45-alańdardaǵy «Zenıt-M» ǴZK-niń jerústi ǵaryshtyq ınfraqurylymnyń barlyq 243 obekt qabyldady.