Qazaqstan men Reseı «Báıterek» ǵarysh zymyran kesheni baǵytyndaǵy jumysty jalǵastyrady

ASTANA. QazAqparat - Búgin Parlament Májilisiniń jalpy otyrysynda «2004 jylǵy 22 jeltoqsandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister engizý týraly hattamany ratıfıkatsııalaý týraly» zań jobasy maquldandy.

Aıta keterligi, Qazaqstan men Reseı arasynda «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisim osydan jyl buryn jasalǵan bolatyn. Jańa ekologııalyq qaýipsiz keshendi qurý «Baıqońyr» aılaǵyndaǵy Proton keshenin almastyratyn bolyp kózdelgen. Bul jobany júzege asyrý úshin eki memlekettiń arasynda birlesken «Báıterek» kásiporyny qurylyp, oǵan 223 mln. dollar kóleminde bıýdjettik kredıt bólingen. Ol besjyldyq jeńildik kezeńdi qosa alǵanda 19 jylǵa berilgen edi.

«Kelisim boıynsha Reseı ushý-synaý alańynan synaqtar tek 2014 jyly ǵana jasaldy. Osyǵan oraı, jobany júzege asyrý sozylyp ketti. «Báıterek» kesheni qurylǵan joq, al bıýdjettik kredıtti qaıtarý merzimi de kelip qaldy. Sondyqtan da, búgingi kelisim qaryzdy qaıtarýǵa jeńildik kezeńdi 2019 jylǵa deıin uzartýdy qarastyrady. Al bul «Báıterek» birlesken kásipornynyń jobamen jumysty jalǵastyrýyna septigin tıgizip, kadrlar men áleýetti saqtaýǵa múmkindik beredi», - dedi Investıtsııalar jáne damý mınıstrligi Aeroǵarysh komıtetiniń tóraǵasy Talǵat Musabaev.

Onyń aıtýynsha, búgingi kúni «Báıterek» jobasyn jalǵastyrý sharttary Reseı tarapymen kelisilip jatyr. «Bul baǵyttaǵy jumystardy jalǵastyrý mańyzdy. Sondyqtan da kelisim «Baıqońyr» ǵarysh aılaǵyn saqtap qalý jáne ony ary qaraı damytý boıynsha da mańyzǵa ıe», - dedi T. Musabaev.