Qazaqstan men Reseı «Báıterek» ǵarysh jobasynyń bolashaǵyn talqylady
QR tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsınniń «Roskosmos» memlekettik korporatsııasynyń bas dırektory ıÝrıı Borısovpen kezdesýinde ǵarysh salasyndaǵy yntymaqtastyqtyń negizgi máseleleri talqylanǵan.
Mınıstrliktiń baspasóz qyzmetiniń habarlaýynsha, Baıqońyr ǵarysh aılaǵynda «Báıterek» ǵarysh zymyran keshenin qurý jobasyn odan ári iske asyrý taqyryby da kóterilgen.
Taraptar jobanyń strategııalyq mańyzdylyǵyn atap ótip, ony iske asyrý jumystaryn jalǵastyrýǵa ýaǵdalasqan.
«Biz «Báıterek» jobasyn iske asyrýdy aıaqtaýǵa nıettimiz, ol Baıqońyr ǵarysh aılaǵynyń bolashaǵyn qamtamasyz etedi. Qazaqstandyq taraptyń da alǵa jyljýǵa nıeti bar», - dep Roskosmostyń baspasóz qyzmeti ıÝrıı Borısovtyń sózinen tsıtata keltirdi.
Kezdesý barysynda taraptar «Báıterek» birlesken jobasy sheńberinde Baıqońyr ǵarysh aılaǵynda «Soıýz-5» zymyran tasyǵyshyn jáne ushyrý keshenin qurý jumystaryn sınhronızatsııalaýdy talqylady.
Reseımen birlesken «Báıterek» jobasyn iske asyrý taraptardyń mindetterin de kózdeıtini belgili: qazaqstandyq tarap jerústi ushyrylymyn jańǵyrtýǵa, al Reseı – «Soıýz-5» tobynyń ekologııalyq qaýipsiz zymyran tasyǵyshyn jasaýǵa jaýapty.
Buǵan deıin Tsıfrlyq damý, ınnovatsııalar jáne aeroǵarysh ónerkásibi mınıstrligine qarasty Aeroǵarysh komıtetiniń tóraǵasy Baýbek Oralmaǵambetov QazAqparat agenttigine bergen suhbatynda «Báıterek» jobasyn iske asyrý barysynda qazaqstandyq tehnıkalyq mamandar konstrýktorlyq qujattamamen jumys isteý, mamandarymyz tolyq qyzmet kórsetetin «Zenıt» ǵaryshtyq zymyran keshenin paıdalaný jáne jumysqa jaramdy kúıde ustaý kezinde quzyretin arttyratynyn aıtqan edi.
